مدني بقرة السلطان دايرة اخت
قبل اندلاع الحرب العبثية كانت شوارع مدينة
مدني…بتشكي من الألم والوجع لكثرة المطبات وتهتك الاسفلت…وتراكم الاوساخ
ومياه الخريف…واصبح في شارع ولا شارعين
من عدد الشوارع المحدودة…لكل تلك الاسباب
بيتحرك فيها المركبات والناس..اصلو مدني صغيرة وكل الطرق (تودي لروما) يعني اي شارع ممكن تصل منه النقطة المعينة…وعشان
الشوارع خربانة وتعبانة…بقى الضغط على شوارع محددة…وتشوف الناس والعربات فيها
تقول (الليلة الوقفة وبكرة العيد)…
فحاول البعض يعكس ذلك الامر عبر بعض
الرسايل السوشلية والبوستات…. دون توجيهها
مباشرة للقائمين على امر المدينة من ولاة الامر….
وفي اثناء المحاولة لتوصيل الرسالة بتاعت ضغط الشوارع مرورياً للسلطان…قومي يا الحرب العبثية وفشلي النية…وجونا ناس الخرطوم أي زول سايق عربية،،،،،،
واكتظت الشوارع بالعربات الواقفة مبركنة على الرصيف…والعربات التايهة وماقادرة تقيف…والعربات السايقاها بنات…وضغط الشارع عايز لي حريف…
وحتى الناس المارة بكرعيهم مرة تمشي ومرة
تقيف…
والموضوع بقى مزعج الزول العايز يطلع للشغل لازم يطلع وعنده احتياطي بتاع ساعتين على الاقل عشان يصل في الزمن..
والعايز يطلع لواجب ..ممكن ينسى الموضوع
ويكسل…والعايز يطلع للفسحة والترفيه بقضي الزمن وهو بتفرج من شباك العربية
الراكبها على المارة والعربات..والمشاكل البتصدر من بعض من فقد اعصابه…وكده بكون قضى فسحته ذهاب واياب في ضغط الشارع..
ناس المرور فشلوا في انهم ينظموا الوضع
واظنهم اصيبوا بالسكري والضغط…وبعضهم
بكون منجلط!!!
ناس ادارة البترول حاولوا يحلوا الازمة بجدولة صرف البترول في المحطات وزيادة سعره…وبرضو الحال في حاله…
وبقت علينا قصة بقرة السلطان المشوا لي
ناس الحلة عشان يربطها…ولما غلبهم يقولوا
كلامهم …قالو لي دايرة ليها اخت
وحسع شوارعنا بدل ضغط عربات سكان مدني وهي اصلا مامتحملة….
جات عليها عربات الخرطوم اخت!!!!!
