الفورة .. مليون ــ الشافعي طاشين ــ *التأمين الصحي .. نموذج الدولة اللي بنحلم بيها* ــ بعانخي برس
بعانخي برس
*أولاً: نصفق من القلب*
في عز الحرب .. وعز العطش .. وعز الغلاء ..
يطلع لينا *صندوق التأمين الصحي بالجزيرة* ويقول:
*”مغطين 3,939,851 مواطن .. بنسبة 78.9%”*
دي ما أرقام ساي .. دي أرواح .. دي أسر .. دي دواء .. دي عيادة
*ده مشروع دولة عديل كده*
*ثانياً: السر وين؟ في الناس*
السر ما في الميزانيات براها .
السر في *الإدارات الشابة والوطنية والشاطرة*
ناس بتجري في عروقهم الإنسانية .. قبل اللوائح
ناس:
*@ إذا قالوا صدقوا*
*@ إذا قالوا بنجيب بجيبوا*
*@ إذا قالوا بنفعل فعلوا*
*@ ما عندهم إجازة*
*@ ما عندهم عيد*
*@ ما عندهم الدوام إنتهى*
*@ ما عندهم ما صرفنا ما جانا ترحيل*
من المدير لأصغر عامل .. *بشربوا الجبنة سوا.. بياكلوا وبشربوا سوا .. وشايلين الهم سوا*
شغل .. شغل .. واجب .. لازم يتنفذ .. وبإتقان
ده نموذج إدارة نحنا محتاجنو في كل وزارة .. في كل محلية .. في كل مشروع
*ثالثاً: أرقام تفرح وتخليك تقيف إحترام *
1. *16 منفذ* لإستخراج البطاقات في كل المحليات
2. *297 مرفق* صحي شغال بالتأمين
3. *2,740,000* مواطن مكفولين عبر المالية .. *115,170* مواطن مكفولين عبر الزكاة
4. *87% من الإيرادات* ماشة مباشرة لشراء الخدمة للمواطن
5. *توسع في خدمات العيون والتشخيص* .. وتأهيل مراكز اتضربت في الحرب .. وطاقة بديلة
رغم هجرة الكوادر .. ونقص المتحركات .. وارتفاع التكلفة .. *مكملين*
*رابعاً: الطموح مشروع*
حكومة الولاية بتقول: *دايرين نصل 96% تغطية*
والصندوق مستهدف *86%* المرحلة الجاية
مع الحوكمة .. والشركات .. وإستبقاء الكوادر .. ودعم الإستثمار .
ووفد المالية الإتحادية جا مدني .. ووقف ميدانياً .. ودعم .
ده هو الشغل التكاملي المطلوب
*الخلاصة: خلوهو نموذج*
يا دولة .. يا مركز .. يا ولايات
*ختو التأمين الصحي نموذج لإدارة المرحلة المقبلة*
نموذج في الصدق ..
في الإنجاز ..
في الإحساس بالمواطن الضعيف .
نموذج في إنو الزول يشتغل بلا ضجيج .. بلا “فورة مليون” فاضية
*تحية للدكتور الأمين حسين عمر وفريقو*
*تحية لوزارة المالية .. وللرعاية الإجتماعية .. وللزكاة*
*وتحية لكل عامل في مركز صحي شايل البطاقة ومبتسم في وش المريض*
ده الشغل الببرد القلب .. وبدي أمل
*وده هو “الفورة المليون” الحقيقية .. فورة عمل*
*والله من وراء القصد*
# الفورة _ مليون
# التأمين _ الصحي _ نموذج
# الجزيرة _ تتعافى
