*الفورة .. مليون* _ *الشافعي طاشين* ــ *ود سلفاب .. هل تكون الحل ولا مجرد وعد في قاعة مكيفة؟* ــ بعانخي برس

*أقامت جامعة الجزيرة المنتدى الدوري الخامس .. والعنوان المرة دي ما ساهل .. *”الثروة الحيوانية .. الواقع والتحديات وآفاق المستقبل”*..
نجي للفورة ..
أولاً .. التحية لجامعة الجزيرة .. في زمن الجامعات بقت تفتش للجباية والرسوم، جامعة الجزيرة قالت دايرة ترجع لدورها الحقيقي .. وده كلام مديرها البروف صلاح الدين العربي ذاتو لما قال: *”البلاد تزخر بثروة حيوانية ضخمة وهي أمان وقوة وضمان للإقتصاد الوطني”* وقال الهدف *”ترسيخ دور الجامعة كمؤسسة علمية رائدة لإيجاد حلول للتحديات”*. كلام محترم .. لكن ..
ثانياً .. فورة الوزير ..
وزير الثروة الحيوانية البروف أحمد التجاني المنصوري جا وشكر اللجنة المنظمة وقال الثروة الحيوانية بقت *”جزء أساسي من الأمن الغذائي”*.. لحد هنا كلام إنشاء سمعناه كتير ..
لكن الفورة المليون هنا:
الوزير أعلن عديل *”إنشاء مدينتين للإنتاج الحيواني في نهر النيل والشمالية تحت إشراف جامعة وادي النيل .. وسنطبق نفس العمل مع جامعة الجزيرة لقيام مدينة إنتاج حيواني في ود سلفاب بمحلية الحصاحيصا”*
يا سيادة الوزير .. ود سلفاب دي نحن حافظنها .. وعود المدن الإنتاجية سمعناها من 2010 .. مدينة في كسلا ومدينة في دارفور .. وفي النهاية بقت لافتة في الخلاء ..
لو مدينة ود سلفاب دي قامت صح .. بتحل 70% من مشاكل الجزيرة .. لكن بشرط .. ما تبقى مؤتمر وتوصيات مكتوبة بصورة علمية زي ما قلت .. وتترمي في الرف ..
ثالثاً.. فورة وزير الإنتاج والموارد الإقتصادية المفوض د. عرفة محمود .. قالت الكلام المفيد الوحيد في المنتدى كلو .. قالت *”ننادي بزراعة وإنتاج الأعلاف في القطاع المروي .. المنتج بيعتمد على القطاع المطري ولشح الأمطار خرجت المساحات من الإنتاج”*
دي هي الأزمة يا جماعة .. البهايم ما لاقية تأكل .. والعلف سعرو بقى أغلى من اللحمة ذاتها .. كيف دايرين ثروة حيوانية وإنتو ما زارعين علف في مشروع الجزيرة؟ مشروع الجزيرة البقى يزرع كل حاجة إلا العلف!
جامعة الجزيرة عملت العليها .. جابت فيلم وثائقي وجابت وزير وجابت خبراء .. لكن ..
*الفورة المليون بتقول:*
كفاية منتديات ..
نحن عاوزين بقر يحلب في ود سلفاب ..
عاوزين علف يتزرع في الجزيرة ..
عاوزين سلالات محسنة زي ما وعد الوزير *”تحسين السلالات وزيادة إنتاجية صغار المنتجين”*
50 سنة نحتفل بجامعة الجزيرة .. ما دايرين نحتفل بالمنتدى الخامس والسادس والعاشر ..
دايرين نحتفل بإفتتاح مدينة ود سلفاب ..
هل نحن موعودون بمدينة حقيقية ولا حنرجع لنفس الاسطوانة: *”نأمل أن تجد التوصيات النور”* كما قالت الوزيرة عرفة؟
الكورة الآن في ملعب جامعة الجزيرة والوزارة ..

# الفورة .. المليون
# عاوزين .. بقر يحلب في ود سلفاب
# عاوزين .. علف يتزرع في الجزيرة
عاوزين .. سلالات محسنة