(خمة نفس) ــ عبدالوهاب السنجك ــ يا وزير التربية والتعليم بالجزيرة.. إن كنت تعلم فتلك مصيبة وإن كنت لا تعلم فالمصيبة أعظم “إشارة ماتم نشره في صحيفة التيار اليوم” ــ بعانخي برس
بعانخي برس
الوزير نفى .. قال: أنا ما وقفت الدورة .. وما أبعدت أي مشارك .. أنا غادرت موقع انعقاد الدورة احتجاجاً على تعديلات طالت قائمة المتدربين دون علمه!!
…
تعالوا نفتت الكلام ده حتة حتة.. بطريق “خمة نفس”
الحتة الأولى: النفي..
نفى وزير التربية والتعليم بولاية الجزيرة الأستاذ عبدالله أبو الكرام توجيه أي قرار بإيقاف الدورة التدريبية التي نظمتها إدارة التدريب بوزارة التربية الاتحادية بالتنسيق مع المجلس الثقافي البريطاني!!.. تمام
جميل.. نفيت الإيقاف .. لكنك أقرت بالمغادرة!!
ما الفرق يا سيادة الوزير بين أن توقف الدورة بقرار مكتوب.. وبين أن تغادر موقع الدورة وانت الوزير المسؤول قدام مدرب دولي و30 معلم؟!
الاثنين إيقاف معنوي يا سعادتك!! الاثنين رسالة سلبية!! ولا مش كدا؟!
المجلس الثقافي البريطاني لما يشوف الوزير غاضب ومغادر .. حيقول الدورة دي فاشلة!!
الحتة التانية: القائمة من 50 بقت 30 .. بدون إخطارك!
وقال أبو الكرام في تصريحه لـ “التيار” إنه لم يصدر أي توجيه بإيقاف الدورة أو استبعاد أي شخص من المشاركين .. موضحاً أن إدارة المرحلة الثانوية بالولاية كانت قد رشحت 50 معلماً ومعلمة للمشاركة قبل أن يُخفض العدد إلى 30 متدرباً بينهم مديرون وموجهون دون إخطاره بالتعديل!! من المسئول ياسيادة الوزير؟!
هنا المصيبة الكبرى!!
يا وزير.. انت الوزير .. كيف يتم تخفيض قائمة من 50 إلى 30 بدون علمك؟!
منو الخفضها؟!
إدارة التدريب الاتحادية ولا إدارة المرحلة الثانوية بوزارة التربية بالولاية؟!
ونقول دا الكلام الجاب الكلااام.
لو الاتحادية هي الخفضت .. يبقى انت ما عندك كلمة في ولايتك!! رايك شنو؟!
ولو إدارة المرحلة الثانوية بولايتك هي الخفضت والعدلت بدون ما تكلمك .. يبقى الوزارة دي قاعدة ساي في الشارع!!
لوانت تعلم فهذه مصيبة .. وان كنت لا تعلم فالمصيبة أعظم!!
الحتة التالتة: تعديلات في قائمة المشاركين – من ثانوي لأساس!! راجع ادارتك منو العمل الكلام دا!!
وأوضح الوزير أنه غادر موقع الدورة عقب تدشينها بعدما علم بتغيير قائمة المستهدفين بالتدريب وانتقال الاختيار من معلمي المرحلة الثانوية إلى معلمي مرحلة الأساس .. مشيراً إلى أن التعديلات تمت حسب إفادته بين إدارة التدريب الاتحادية وإدارة المرحلة الثانوية بوزارة التربية والتعليم بالولاية!!
حاجة غريبة وعجيبة والله..طبعا انت مش عارف!!
أها.. دي الحتة الأخطر!!
القائمة الأصلية كانت لمعلمي ثانوي .. بقدرة قادر بقت لمعلمي أساس ومدراء وموجهين!!
سؤال بريء: لماذا؟!
هل لأنه في ناس عايزين يدخلوا ناسهم؟!
هل التدريب ده كان مخصص لتخصص معين في الثانوي .. الانجليزي مثلاً .. لأنو بالتنسيق مع المجلس الثقافي البريطاني .. فجأة بقى مدراء وموجهين ما عندهم علاقة بالمادة؟! نحن مش عارفين والله؟!
ولما انت عرفت .. ليه ما وقفت وصححت الخطأ؟! ليه اخترت المغادرة والاحتجاج الصامت؟!
الوزير ما بيغادر .. الوزير بيصحح!!
الوزير ما بيحتج بالمغادرة .. الوزير بيصدر قرار!! ولا مش معانا في كداا.. ؟!
الحتة الرابعة: القائمة المعدلة ضمت 30 مشاركاً بينهم 28 معلماً ومعلمة وموجهان .. والاختيار اقتصر على محليتي مدني الكبرى وجنوب الجزيرة دون إشراك بقية محليات الولاية!!
هل تم ذلك دون علمكم؟!
دي حتة براها كارثة عدالة!!
يعني بعد ما نقصت من 50 لـ 30 .. وبعد ما تم تحويلها من ثانوي لأساس .. كمان حصرت في مدني الكبرى وجنوب الجزيرة!! الكترابة.
وين باقي محليات الولاية ؟!
وين المناقل والحصاحيصا والكاملين والقرشي؟!
معلم المناقل ما سوداني؟! ما محتاج تدريب بريطاني هدية؟!
وده تدريب ولائي ولا تدريب محلي؟!
الحتة الخامسة: قلت غياب التنسيق يثير الاعتراضات – وشعور بالغبن!!
عزا أبو الكرام مغادرته إلى عدم إطلاعه على إجراء تعديل قائمة المتدربين .. مشيراً إلى أن التغيير أثار شعوراً بالغبن وسط معلمي المرحلة الثانوية الذين سبق ترشيحهم بواسطة إدارة المرحلة بالوزارة!!
معاهم حق والله!!
شعور بالغبن .. كلمة كبيرة!
المعلم لما يشعر بالغبن .. كيف حيعلم التلميذ الرضا؟!
المعلم لما يتم ترشيحه من إدارته .. ثم يشطب اسمه بدون سبب .. تاني حيحترم إدارته كيف؟!
طبعا لايمكن!!
انت يا سيادة الوزير عرفت بالغبن .. وغادرت .. وتركت الغبن قاعد في محلو ودي!! بحلوها كيف بس قول لينا؟!
خمة نفس أخيرة مجمعة:
يا وزير التربية..
روايتك برأتك من تهمة منع المدرب ما قلنا حاجة.. لكنها أدانة بتهمة أكبر: أنك لا تعلم ما يدور في وزارتك!!
50 بقت 30 بدون علمك!!
ثانوي بقى أساس بدون علمك!!
8 محليات بقت محليتين بدون علمك!!
قائمة تعدل بين إدارة اتحادية وإدارة ولائية بدون علمك!!
انت وزير ولا ضيف شرف بيجي يدشن ويمشي؟!
نقول جماعتك دقسو بيك عدييل.. والجماعة ديل قاعدين معاك في الوزارة!!
ها قول لينا حا تعمل شنو؟!
لو ما قادر تضبط قائمة تدريب فيها 30 معلم .. كيف حتضبط تعليم فيهو آلاف المعلمين ومئات المدارس؟!
قول لينا لعشان نخفف خمة نفسنا شوية!!
الحل ما مغادرة موقع التدريب..
الحل والنزول لأرض الواقع..
وإلغاء القائمة المعدلة.. وإرجاع القائمة الأصلية الـ 50 معلم ثانوي.. وتوزيعها بعدالة على كل محليات الجزيرة!!
غير كده.. يبقى انت ماشي تدشن الدورة وما عارف الحاصل شنو.. يعني ماشي مع الجماعة وما عارف الميت منو!!
طيب قلت الدورة التدريبية مستمرة ما اختلفنا لكن المحاضر منو؟!
دولي ولا محلي؟! عايزين نعرف وبس!!
جيش واحد.. شعب واحد.. والتعليم لا يدار بالغبن يا ابوالكرام.
