نقطة (1)
التحية كل التحية لقواتنا المسلحة والقوات المساندة لها، والتحية للأجهزة الأمنية كافة في ولاية الجزيرة وهي تقدم التضحيات لأجل وطن متعافٍ سليم. كل التقدير للذين يقفون على أقدامهم ليل نهار ببوابات الارتكاز منعاً للتهريب. ندعو الله أن يغفر لشهداء الواجب الوطني من جهاز الأمن والمخابرات الذين قدموا أرواحهم طاهرة في حادثة “التندار” التابعة للقوات المساندة بولاية الجزيرة، والشفاء العاجل للجرحى والمصابين.
نقطة (2)
منو العامل “دقار” لقطار مدني – الخرطوم “المارد الأخضر” عشان ما يتحرك شبر واحد لقدام؟ لو هيئة سك حديد السودان، التي أُنشئت منذ عهد الإنجليز المستعمر، نقول ليها: حرام عليكم. بدل تتقدموا خطوة، بتتراجعوا ألف مليون خطوة. البصات السفرية هلكت جيوب الناس، وانتو ما قادرين ترجعوا جملة “لا بديل للسكة حديد إلا السكة حديد”. أقول ليكم شنو؟ رأيكم شنو بنظام الـ BOT مع شركة أجنبية وانتو اطلعوا منها؟ وكدا نكون مرتاحين موية ونور.
نقطة (3)
سيد الأتيام فريق الأهلي مدني بولاية الجزيرة – وسط السودان – يفوز بالكأس ويضرب الفاشر بثلاثة أهداف مقابل هدف واحد. نبارك لكم الفوز.
نقطة (4)
حكومة ولاية الجزيرة اتجهت لإعلان بيع الأراضي الحكومية، وأظنها ما ح تخلي شبر ولا سنتيمتر واحد ليه؟ لأنه مافي قروش تغطي المطلوبات، ولا عندها صادر إنتاج، ولا مصنع مدوّر، ولا.. ولا.. مفكرة تفتش عن البدائل؟ تبيع بس، والجرس مدوّر من الحصاحيصا حتى أم بارونا. ربنا يستر على بيوتنا ما نلقي يوم الدلالة واقفة قدام البيت.
نقطة (5)
جنوب برج عمال اتحاد نقابات ولاية الجزيرة وغرب المكان.. دا شنو كمان يا محلية ودمدني الكبرى وإدارة شرطة المرور؟ امشوا شوفوا براكم.. أنا قلت حاجة؟
(خمة نفس)
أغلقوا أندية المشاهدة في السوق العمومي.. فيها وفيها. الكثيرون يعلمون ما فيها.. وهذا كلامي ليكم.
(خمة نفس)
شعب واحد.. جيش واحد.
