(خمة نفس) ــ عبدالوهاب السنجك ــ ولاية الجزيرة بين البيلي والإذاعة والتلفزيون واستحقاقات المعلمين ــ بعانخي برس

المشهد في ولاية الجزيرة باهت لا لون ولا طعم له في هذه الأيام، رغم نعمة الأمن… الورقة الإدارية التنفيذية تلاعبها رياح خريف قادم.. وكلٌّ عاش تقلبات الفصول التي تكون قوية فتهز الأرض هزًّا.

غيّب المرض الوالي الطاهر إبراهيم الخير الفترة الماضية، فنهض الكرسي. نهض ليجد الأستاذ مرتضى البيلي واقفًا، أمين أمانة الحكومة، ليقول “بسم الله” ويشيل الشيلة: زيارات اجتماعية، افتتاحات، طواف ماكوكي على الوزارات والمحليات والرموز الاجتماعية الشارع سمّاه براهو: “الوالي بالانابة الذي لا يهدأ”.

بالأمس وقف داخل مباني الإذاعة والتلفزيون بمدني ليسأل: ما الأسباب والمشاكل التي تمنع الشاشة من الظهور؟ نقولها ليك نحن عديل “إدارية” يا سعادة الوالي بالانابة. هنا كاميرات ومايكات من خزينة الولاية ومافي حاجة تاني.. وابتسامة تملأ المكان.. حضورك ثقيل، وحضور يقول: “الكرسي فاضي.. وأنا الماليهو”. الوالي الخير خارج البلاد مؤديًا مناسك الحج، وأنا هنا معكم.. دي واحده..

وزارة المالية بالولاية أعلنت عن 50% من استحقاقات المعلمين. نص حق.. ونص صبر.
نص حق دي شنو يا ناس؟
نص حق ما بتدفع إيجار. نص حق ما بتشتري لبن. نص حق ما بتسكّت أسرة معلم.. ونص الصبر ما معروف نصرفو من وين!!

حكومة ولاية الجزيرة افتكرت الـ 50% دي “حلحلة”.. المعلم فهمها صح: “قروشي كاملة عندكم.. لكن بتجزوها لي”. وده ما اسمو حل ابدا وانتو عارفين.

البيلي يزور الإذاعة والتلفزيون عايز الشاشة تجيب الصورة والإذاعة تطلع الصوت، لكن مافي فايدة.. وانت عارف وأنا عارف يا سعادتك!! والمعلمين شغالين حساب: المرتب ناقص النص، والشهر ناقص كامل. ووزير التربية والتعليم ما عارف يعمل شنو مع العام المضغوط، والمعلمين وأولياء الأمور شادين الحبل…
ولاية الجزيرة بتعرض قضتين على خشبة مسرح الوجع.

البيلي يزور ويتفقد ويبتسم. الكاميرا شغالة، والنشرة عامرة، وهمس الشارع يكبر: “ده الوالي الجاي”.. ممكن ما اصلو من داخل حوش ديوان الحكم المحلي الاتحادي الجاب الوالي الخير، ممكن يجيب البيلي.. وين المشكلة يعني!!

القضية التانية للوجع.. معلم واقف قدام السبورة، الطباشير في يدو والهم في قلبو. يشرح للطالب التمسك “بالوحدة الوطنية” وهو ما لاقي حق المواصلات.. يا سلام عليك يا أستاذ كفيت ووفيت..ما يهمك ح تصرف مستحقاتك على دائرة المليم..

لكن بين القضيتين ح تضيع الولاية.. بين زيارة الإذاعة والتلفزيون وبيان المالية ضاع مستقبل الطلاب. لأن المعلم قالها واضحة: يا كلو.. يا بلاش. والـ 50% ما بتطفي نار اللدايات.
ويا ناس المالية الـ 50% دي ما منحة ولا صدقة. ده حقّ عديل، رجعتو نصو وقرصتو نصو.. ليه كدا بس؟

ويا أ. البيلي الزيارات براها ما بتحكم ولاية. ما بتبني فصل، والتصريح ما بحل مشكلة ابدا، لكن أحسن تقعد مع المعلم في بيتو زي ما قعدت ناس الإذاعة والتلفزيون ورموز المجتمع. اسألو عايش كيف.. كان صرفنا ليك 50% النص الباقي ح تجيبو من وين؟.. وكدا بتكون الكرة في ملعبك.. واللاعب الخريف بعرف يجيب قوون في آخر ثانية من المباراة.

الحقيقة الوالي الطاهر الخير غاب جسدًا وحاضر اسمًا. والبيلي حاضر جسدًا.. لكن وين القرار يا سادة؟!

الجزيرة واقفة على سنّ سكين: كرسي فاضي + والي بالانابة + معلم زعلان وسوق مولع نار…
اها نعمل شنو يا أهل الجلد والراس؟
نقيف بعيد ونشخط شخيط ولا نلعب شليل وينو أكلو الدودو؟.. ولا نصبر، ممكن يكون الجاي أحلى…

(خمة نفس)
..الي مجلس حماية البيئة بالولاية.. السلام عليكم.. خليكم قريبن ما تبتعد.

(خمة نفس)
شعب واحد.. جيش واحد.