(خمة نفس) ــ عبدالوهاب السنجك ــ الموسم الصيفي في الجزيرة وشربوت أهل العريس ــ بعانخي برس

اصل الحكاية على قول الراوية وتلك الفترة من الزمن الماضي وتأني “ماهو راجع” ..
سوو الشربوت بعد غلى التمر على نار هادية ورمو فيه القرفة والهبهان وجنزبيل (بهارات حلوة) اسبوع هو يجقجق، وبعد داك صفوهو في الزير الكبير من تفل التمر والمصماص، ويقعد مغطى لمن دخلت ايام العرس يعني كداا ممكن نقول زي اسبوعين،..

وجينا اتلمينا كلنا ناس فلانة.. وفلانة، وهاك يا جكي وجكك.. والحكاية دورت لمن شبعنا تب..الدلوكة مدورة والزغاريد فوق في السماء.. ونحنا كورتي وكورتك لمن شبعنا والعوينات طششن ولسانا تقل والكريعات حلف ما يمشن، والجوع ضربنا.. انتي يا الفالحة” المتشوبرة” قومي من دربك على التكل افرشي الكسرة في الصحن الكبير، وجات علينا شايلاهو .. قومن هوى يانسوان على العشاء..

اتفرجخنا في الواطة ولقمة ولقمتك..اماني ماهي حلوة حلاة كسرة بشوربة والعيضمات المقرمشة،..

قسمت بالله ما اظنوا في شى وقفني من الاكل الا لمن بلعت لي صابونة،.. اتاريهو” المتشوبرة” دي ملحت لينا الكسرة من حلة غسيل مواعين المناسبة
.. الله يقطعك ما قطعتي علينا سكرة الشربوت.

… اسع دا إدارة مشروع الجزيرة لحق” المتشوبرة” مالك على الري،ما كان تخلوهم يموتوا موتن ويتحملوا المسئولية براهم براكم جبتوا النبيشة لي رقبتكم وعايزين تختوا اللوم على الخريف… وتقولو لينا الخريف تكميلي في العروة الصيفية عشان كدا حصل عطش، لكن ما ناس الأرصاد قالوا ليكم السنة الخريف مغير رايو منكم ما جاي عدييل كدا، ليه ما عملتوا حسابكم..
واسع آخر اجتماعات ولجان طوارئ وحكومة د. كامل ومعاها حكومة ولاية الجزيرة وإدارة المشروع قايمين وقاعدين،لكن بعد شنو بعد الرماد كال حماد.. ياجماعة.

.. والله المزارع مسكين الله يكون في عونك ياملح الأرض الجاتك في مالك سامحتك..ونحنا الراجينا كتير.

(خمة نفس)
جيش واحد.. شعب واحد