(خمة نفس) ــ عبدالوهاب السنجك ــ أنقذوا تعليم الجزيرة قبل ما ندفن جيل كامل ــ بعانخي برس

ولاية الجزيرة قررت تبدأ العام الدراسي 1 يونيو. كلام سمح في الورق، كارثة في الواقع.
يعني220 يوم دراسة اتخنقت في 70 يوم
ده ما تعويض، ده تخدير. عايزين تلمو منهج سنة كاملة في شهرين ونص وتمتحنو الطالب. النتيجة حتكَون صفر فهم، شهادة ورق،
وكمان الطالب ما عارف نجح ولا رسب
كيف تدخل ولد أول متوسط وهو لسه ما عارف نتيجة سادس؟ التعليم تراكمي يا ناس. تخيل يدرس معادلات وهو ساقط في أساسيات الرياضيات. النتيجة: إحباط، رسوب مضاعف، كراهية للمدرسة.
اللائحة واضحة: مافي ترقية بدون مؤهل
القرار الشفهي ما بيلغي القانون. بيغير مصير الطالب بس. بعد شهر يطلع ساقط ويرجع سادس قدام زملانه الجداد. كسرة نفس ما بتتجبّر.
َوالمدارس نفسها تايهة
فصول وهمية فيها 80 طالب، نصهم منتظر نتيجة. المعلم يشرح لمنو؟ للنجح ولا للسقط؟ الكتاب مافي، المقعد مافي، والزمن مافي.
الحل واضح وما داير فلسفة ولا كلام كتيرن
أجلوا البداية لأغسطس 2026م. يونيو 2025 = 70 يوم ضغط نفسي + طالب معلق + موارد ضايعة.
الانطلاق في أغسطس 2026 = 8 شهور دراسة حقيقية + نتيجة طالعة + معلم شغال صاح.

شهرين انتظار أحسن من سنة ضايعة من عمر طالب.

البلد بعد الحرب محتاجة استقرار تربوي، ما محتاجة استعراض “أول ولاية بدت”. جارين عشان نلحق الولايات، وفي النهاية حنقع كلنا.

ضرب الجرس قبل ما تطلع النتيجة زي الزول البفتح الباب وما سأل “مين برا”.
اقفلوا الباب شهرين، صححوا، أعلنوا النتيجة، افتحوا المدارس والناس مرتاحة.
سؤال واحد لوزارة التربية بالجزيرة:
عندكم جرأة تتراجعوا وتعلنوا تقويم محترم؟
ولا حنكمل في مسرحية “العام التعويضي” لحدي ما نعوض 4 شهور بـ 70 يوم ضياع ووهم!!

الجيل ده ما بتحمل تجربة تانية. إلحقوه قبل ما يضيع..
وندعوا الله ما يزيد علينا خمة النفس اكتر من كدا.
“أنقذوا التعليم في ولاية الجزيرة” .

(خمة نفس)
تفتكروا خروف العيد ح يقول باااااع.

(خمة نفس)
شعب واحد.. جيش واحد.