(خمة نفس) ــ عبدالوهاب السنجك ــ مجلس عبدالباقي… اسمعوا كلام الببكيكم ما تسمعوا كلام البضحكم ــ بعانخي برس

.. مجلس م. عبدالباقي مبروك الفوز بنسبة 96%
.. مبروك التوافق
..مبروك الـ 147 صوت.
.. ثمانية سنوات مضت، صراخ في واد الصمت.

لكن يا مجلس… الف مبروك ما بتحرث فدان واحد ولا بتحفر ابعشرين،
والتصفيق ما بروي ترعة ولا بشيل عنها القش والمسكيت والعشر.

والكرسي الوثير بودمدني ما بحصد قطن ولا بجيب عائد الصادر بعد الحليج ولا بعالج مزارع من الملاريا.

مشروع الجزيرة ما ناقص تجارب
انتو جايين في أسوأ توقيت في تاريخ المشروع.

الري عطشان.
الأسمدة بسعر الدولار.
التمويل مافي.
والمزارع مديون لطوب الأرض.

دايرنكم تقودوا 133 ألف مزارع؟!

وما دايرين 133 ألف شماعة نعلق عليها الفشل بعد سنة؟!

ما عايزين تنظير، ومذكرات.. و “رفعنا الأمر للجهات المختصة”.. عايزين شغل.. آليات تقانة زراعية تقاوي محسنة إرشاد زراعي و.. و

اخلعوا الجلاليب السياسية… قبل ما يقلعكم المزارع” ملح الأرض” .

يا م. عبدالباقي نور الدائم
عارفنك راجل صبور وعندك خبرة نقابية متراكمة. الرصيد ده محترم.
لكن الصبر براهو ما بصلح كبرى ومشاية والخبرة النقابية ما بتطهر ترعة ولا بتكسر لبقة..الشدة في تطبيق القوانين واللوائح هي المسار الصحيح، يعني مافي مجاملة.. وكلام الناس شيلوهو صره في خيط وما تزعلوا منو، شيلوا السمح وخلو الكعب لانو مزارع اليوم ماهو مزارع امبارح خريج متعلم، ممكن يضرب الهواء بوهية، وعارف البير وغطاها وكمان عارف متين يشد الحبل ومتين يرخيهو.. وحيكون بينكم وبين المزارع شعرة معاوية بن سفيان واهل الكوفة..

ونقول ليكم من الليلة…
انسوا الحزب الجابكم.
انسوا المنطقة الطلعتكم.
انسوا المحاصصة القسمتنا 30 سنة..

والله عارف.. وانتوا عارفين، ونحنا عارفين ،ومافي زول تاني بخت الخمسة فوق الاتنين الكلام يطلع عدييل مافيهو مجاملة” واسمعوا كلام الببكيكم ما تسمعوا كلام البضحكم”

ناس المجلس البسوا جلابية التربال.
الشايلة الهم.
الشايلة الدين.
الشايلة عيال في سالجامعات والمدارس والرسوم المردومة فوق ضهرو.

لو دخلتوا الاتحاد بعقلية “نرضي فلان ونراضي علان” مافي فايدة ” ونقول الرماد كال حماد ويادنيا عليك السلام”
.. حتكونوا نسخة كربونية من المجالس الفشلت قبلكم.
وحيجي يوم نكتب عنكم: “كانوا هنا… وأكلوا وشربوا ومشوا”
مشروع الجزيرة دولة واقتصاد.. قال ليكم المحافظ نحن جاهزين، واتكلم معاكم اللواء كيكل وقال انا معاكم وقدامكم كمان، ونضم معاكم ممثل والي الجزيرة أ. مرتضى البيلي وقال ليكم يدنا فوق يدكم. تاني عايزين شنو!!

(خمة نفس)
مشروع الجزيرة ما عايزوا يكون حقل تجارب تاني.
ما بنرجع للمربع الأول حتى لو جبتوا لينا قانون من المريخ..

عندكم 3 ملفات لو ما اتحلت في 6 شهور… استقيلوا أحسن:
الري.. دايرين موية في الزمن والتوقيت المحدد ” الزراعة مواقيت” . ما دايرين وعود.

التمويل.. دايرين مدخلات بسعر يحترم المزارع. ما دايرين شحدة من البنوك ومع داا كلو مصانع تحويلية، ومصانع أسمدة ” يوريا وداب” عشان نبيع للسوق والباقي للتصدير.
.. ودايرين سعر مجزي يحفظ كرامة المزارع المنتج. ما دايرين خسارة.

والا يكون انتخابكم ده كان “ونسة ساي” ودق حنك ساااكت والـ 96% دي كانت مجاملة.
.. الكلمة الأخيرة
يا مجلس…
التاريخ ما برحم.
والتربال فاتح عيونه.
والقلم في يدنا… وحيكون في يد التاريخ بعدكم.. اهاااا رايكم شنو!!

يا تبقوا رجال المرحلة وتنقذوا المشروع
يا تبقوا رقم في قائمة “من خذلوا الجزيرة”

اختاروا. والزمن بدأ يحسب عليكم من هسي.. من تاريخ انتخابكم..
وكلامنا الجاكم حار.. وخمواا نفسكم ساااااكت.

(خمة نفس)
جيش واحد.. شعب واحد.