أضع سؤالي من أمامكم.. ماذا بكم؟!
هل تريدوننا أن نعود للقرون الوسطى والجاهلية الأولى؟!
كيف تفكرون في مستقبل أمة بكاملها؟! ووضع لا يمكن تجاوزه والطعن على ظهره.. من أين لكم هذه الأفكار الجهوية والمناداة باسم المناطقية والقبلية؟! هل تريدون للوطن أن يتمزق قطعة بعد قطعة؟!
أليس ما تم من فصل جنوب السودان عن الأصل جريمة؟! وها أنتم تنادون تحت شعار التهميش.. أي تهميش هذا؟! وإن كان أبناء الوطن كلهم يركبون على سرج واحد.. كلهم مهمشون يكابدون الليل بالنهار.. غير أنه الوطن..
ماذا بكم؟!
واحد يقول ليك أنا من الشمال.. والتاني يقول أنا من الغرب.. والتالت يقول أنا من الشرق.. والرابع يقول أنا من الوسط..
طيب وبعدين؟!
نحن ح نفضل كدا.. كل زول شايل قبيلتو في كتفو وماشي بيها السوق؟!
القبيلة زمان كانت عز.. كانت ستر.. كانت كرم.. كانت نخوة.. كانت الزول يموت عشان جارو..
هسي بقت بطاقة.. بقت وظيفة.. بقت منصب.. بقت بندقية.. بقت بوابة للنهب والسرقة باسم أهلي وأهلك!!
يا جماعة.. القبيلة ما دولة.. والمنطقة ما وطن..
الوطن أكبر من بيتك.. وأكبر من قريتك.. وأكبر من قبيلتك..
الوطن ده.. هو الزول القاعد جنبك في الصف.. هو المزارع في الجزيرة.. هو الراعي في كردفان.. هو التاجر في بورتسودان.. هو الطالب في الفاشر.. هو العسكري الواقف في الليل يحرسك وانت نايم!!
التهميش الحقيقي ما تهميش قبيلة.. التهميش الحقيقي تهميش وطن كامل!!
كلنا مهمشين.. الشمالي مهمش.. والجنوبي مهمش.. والشرقي مهمش.. والغربي مهمش.. والوسط مهمش..
الفقر ما بيعرف قبيلة.. والجوع ما بيفرز بين شمالي وغربي.. والمرض ما بيسألك انت من وين قبل ما يضربك!
الباعوضة البتقرصك في مدني.. هي نفس الباعوضة البتقرصك في نيالا.. والشمس البتحرقك في دنقلا.. هي نفس الشمس البتحرقك في القضارف!!
طيب ليه بنخلي ناس يلعبوا بينا؟!
ليه بنخلي زول قاعد في فندق بره السودان.. يرسل لينا خطاب.. يقول لينا: أهلكم مهمشين.. قوموا شيلوا سلاح؟!
هو قاعد ياكل في البيتزا.. وانت قاعد تموت هنا عشان كلامو!!
وأسألكم سؤال تاني..
الزول البنادي بالمناطقية ده.. لو مسك الحكم.. ح يعمل شنو؟!
ح يبني مدرسة؟! ح يبني مستشفى؟! ح يفتح طريق؟!
ولا ح يبني لي أهلو بس.. ويخلي الباقين؟!
ما هو ده الحاصل هسي.. كل زول جاء.. جاب أهلو معاهو.. وملأ بيهم المكاتب.. وقال ده حقي!!
وفي النهاية لا أهلو شبعوا.. ولا الوطن قام!!
نحن ما ناقصين تمزق..
نحن انفصل مننا الجنوب.. ولسه الجرح ما برا.. ولسه الدم ما وقف.. ولسه الأمهات بيبكوا على أولادهم..
تاني دايرين نقطع شنو؟!
نقطع الجزيرة؟! نقطع الشرق؟! نقطع دارفور؟! نقطع الشمال؟!
نفضل في النهاية كل زول قاعد في حوشو براهو.. وكل حوش عندو علم براهو.. وكل علم عندو نشيد براهو؟!
لا يا جماعة.. كفاية!!
السودان ده لو اتقسم تاني.. ما ح يفضل فيهو حاجة تتقسم..
ح نفضل نتشاكل على حفرة موية.. وعلى شجرة.. وعلى شارع تراب.. وعلى بير جاز..
والعالم ح يضحك علينا.. ويقول: ديل ما قدروا يحافظوا على بلدهم.. كيف دايرين يبنوها؟!
اسمعوني كويس..
الوطنية ما كلام في الميديا..
الوطنية إنك تحب جارك.. ولو كان من قبيلة تانية..
الوطنية إنك تقيف مع المزارع في الجزيرة.. زي ما بتقيف مع أخوك في دارفور..
الوطنية إنك لما تشوف ظلم في أي حتة في السودان.. تقول ده ظلم.. ما تقول ده ما بيخصني.. لأنو ما من أهلي!!
نحن لو ما اتوحدنا هسي.. والله تاني ما ح نتوحد..
الحرب دي علمتنا درس غالي.. علمتنا إنو البيت لو اتشقق.. الحرامي بيدخل من الشق..
والوطن لو اتشقق.. العدو بيدخل من الشق!!
خمة نفس أخيرة:
ماذا بكم؟!
بدل ما تنادوا: أنا من وين.. نادوا: أنا سوداني!!
بدل ما تقولوا: قبيلتي أولاً.. قولوا: السودان أولاً!!
بدل ما ترفعوا راية المنطقة.. ارفعوا راية الوطن!!
بدل ما تحفروا لي أخوك حفرة.. احفر معاهو بير موية يشرب منها هو وانت!!
التاريخ ما ح يرحم زول مزق وطنو عشان كرسي.. ولا عشان منصب.. ولا عشان وهم اسمو التهميش..
التاريخ ح يكتب: هنا كان في شعب.. كان عندو وطن كبير.. قسموهو بأيديهم.. حتة حتة.. لحدي ما ضاع!!
ما دايرين التاريخ يكتب كدا..
دايرين التاريخ يكتب: هنا كان في شعب.. اختلف.. اتشاكل.. اتحارب.. لكن في النهاية.. رجع.. وقال: السودان واحد.. وما بنقسم!!
جيش واحد.. شعب واحد.. ووطن واحد.. ما بيتقسم!!
