*الفورة .. مليون* ــ *الشافعي طاشين* ــ *تأجيل بلا خجل .. والعذر أقبح من الذنب!* ــ بعانخي برس

معقول؟ عام دراسي كامل يتأجل لأسبوع كامل عشان “ترتيبات إدارية وتهيئة البيئة المدرسية”؟
بالله ده كلام يقولو وزير تربية وتعليم؟ ده العذر الأقبح من الذنب ذاتو .
وين إنتو من زمااااااان؟ ليكم شهور قاعدين .. لا رتبتوا، لا هيأتوا، لا جهزتوا فصل ولا كرسي ولا سبورة .. ولما دقت ساعة الصفر جيتونا ببيان بارد: تأجيل لأسبوع .
ده إسمو *دفن الليل أب كراعاً بره*. والشعب شايف الكراع .
ده ذر للرماد في العيون .. ويا ريت رماد ساي، ده رماد حارق لمستقبل أولادنا .
ولا .. في حاجات تانية حامياني؟ قولوا الحقيقة للمواطن .. هل المدارس غير جاهزة؟ هل المعلم ما لقى حقو؟ هل الكتاب ما إنطبع؟ هل البيئة منهارة لدرجة ما بتتأجل بأسبوع؟
ما ممكن كل سنة نفس الفيلم .. نأجل ونرقع ونقول لن يؤثر على التقويم والخطة الدراسية .. وهي الخطة ذاتا وينها؟
التعليم في الجزيرة ما ناقص تجريب .. الولاية دي كانت منارة، والليلة بقت تنتظر أسبوع عشان ترتيب إداري؟ الإدارة دي شغل سنة كاملة، ما شغل أسبوع تأجيل .
يا سعادة الوزير .. الناس دايرة شفافية، ما دايرة تبرير .. الطلاب في الشارع وأولياء الأمور في حيرة .. والمعلم منتظر كلمة واضحة .
لو ما قادرين .. قولو ما قادرين .. لكن ما تستخفوا بعقول الناس بعذر مكشوف .

# الفورة .. مليون
# فورة .. بتحرق
# مستقبل الأولاد .. ما لعب
# دايرين شفافية .. ما تبرير