الأولويات .. الأولويات
*نحلق في السماء .. وأرجلنا غارقة في الطين*
*مدني – سبتمبر 2026*
*الخبر المفرح*
ورد في *وكالة الأنباء الرسمية “SUNA”* خبراً يقول:
*”ولاية الجزيرة تسرع خطواتها نحو السماء بتحريك مشروع المطار وتوفير طائرتين”*
*والله خبر يفرح القلب*
طيران .. مطار .. ربط جوي .. إستثمار .. دي كلها علامات نهضة وتقدم .
وصفقنا .. وقلنا: “أخيراً الجزيرة راجعة بقوة”.
*لكن!!!!! الواقع على الأرض بقول شنو؟*
*نفس الولاية دي .. ونفس الحكومة دي ..*
*ليها قرابة العام ما قادرة تكمل سفلتة 20 كلم*
داخل *مدينة مدني*.. وبتمويل *جاهز من بنك أم درمان الوطني* و”القروش في اليد”.
*الخريف دخل وطلع .. والأسفلت ما جا .*
*وشوارع الدباغة ومايو 40 ونوبري الجديدة لسه مراحل أولية .*
*هنا السؤال المنطقي: الأولويات وين؟*
طيب نمشي السماء .. ما عندنا مشكلة .
*لكن نمشي بياتو شارع؟
الخبر لم يوضح:
1. *أي مطار المقصود* 2. *وين موقعه؟*
3. *المسافة كم من حاضرة الولاية؟*
4. ومساحة الاراضي التي تم تبراتها وتجهيزها لإقامة المطار.
نحن إفترضنا إنه *مطار ود المهيدي – شرق مدني*
البنسمع بيه من زمن *الوالي الفريق أول ركن عبد الرحمن سر الختم* نسأل الله له رحمه والمغفرة .
*طيب عندنا إقتراح “ود بلد” للحكومة ولناس صافات*
لو المطار ده *منحة من ناس صافات*.. *حباب النافع وياها المحرية فيهم* 👏
ديل أهل خير ودايماً سباقين .
*بس عندنا طلب صغيرون مع المطار:*
*سفلتوا لينا معاه شارع أم القرى 25 كلم “هوادة”* عشان يربط المطار بالطريق القومي (مدني _ القضارف _ كسلا _ بورتسودان)
عشان نقدر نصل من مدني للمطار “بمزاج” وما نغرز في الحفر والطين .
وبعدها .. *خلوا حكومة الولاية برواقه تكمل سفلتة طرق مدني الـ 20 كلم* البديناها من زمن .
*الخلاصة:
يا ناسنا*
*الطيران مهم .. والنهضة مهمة .. والإستثمار مهم .*
*لكن الأولوية للأرض قبل السماء .*
المواطن الليلة ما بقدر يطلع من بيته بسبب الطين .
كيف حيقدر يصل المطار؟
*ما ممكن نركب طيارة من مدني .. ونحن ما قادرين نطلع من مدني .*
*أنجزوا الأرض أولاً .. ثم حَلِّقوا للسماء .*
عشان يكون الهبوط آمن .. والإقلاع فخر .
*والله من وراء القصد*
*مواطنو ولاية الجزيرة*
# الأولويات _ الأولويات # سفلتوا الأول
—
