اخذ حاج سيداحمد من ظل شجرة النيم مجلسا، تجده دائما ممسكا بغصن صغير سقط من اعلي الشجرة بشدة حرارة الشمس، حاج سيداحمد يجرر خطوطا ويكتب ارقاما غير مفهومة واحيانا يطلق همهمة بصوت خافت، المارة يبادلونة التحية والسلام،. فدائما مايكون رده مبتسما..
.. كتب عبارة اين نحن الان؟؟ وقف من امامها طويلا بحثا عن الاجابة.. وهو في حالته هذه،اذ بحاج حمد (العريف) يقف بالقرب منه قائلا،،
انت ياحاج سيداحمد اليومين ديل ما عاجبني مالك تكتب وتمسح وتشخبط ماخلاص الموضوع انتهي والجماعة عردوا والجيش حا يكملن نفاخ النار.. ارتاح شوية واحسن نشوف كيفن نقيف علي حيلنا بعد ما الحصل لينا دااا
… كلامك سمح ياحاج حمد لكن الشئ المستغرب ليهو والمجنني مجنون السوق الطلع دعامي يعني انا كنت المغفل ليهو، كل يوم بديهو العندي وطلع لي حاجة تانية، تصدق الزول المجنون الحايم وسط الناس كان ما مجنون المجانين نحنا، وانا بقول كلامي وما خايف من اي زول، يعني لمن نسمع ناس الخرطوم عملوا كشة للمجانين وكبوهم لينا في الجزيرة، ما في زول في حكومتنا يقول ليه بس كدا.. ما تودوهم بعيد مننا ولا تختوهم في معسكر براهم، لكن للاسف طلعوا كلهم مجانين خونة، ومجنون السوق وانا كنت بعطف عليهو هو اول من طلع الجلابية الوسخانة المشرطة ولبس الكدمول وشال السلاح وجاني عدييل في بيتي وقال لي اطلع من البيت ما القاك هنا تاني،، وطلعت مع اولادي شقينا الترع شئ كداري وشئ بالكوارو.. لمن وصلنا المناقل وتاني كسلا، واسع دا الحمد لله الجيش حرر الولاية ورجعنا لكن ياحاج حمد لسع المجانين والمشردين قاعدين وسط السوق وديل اخطر حاجة.
.. ياحاج سيداحمد انت تعرف السجن مليان من المتعاونين والمحاكم شغالة وتطبق القانون بحذافيروا نقطة فوق النقطة مادة فوق المادة..
.َ.لكن ياحاج حمد موضوع المجانين والمشردين ديل حقوا نعمل حسابنا منو بجد لانو دا قنبلة موقوتة وانت ما عارف السرق وخرب البيوت منو.. لمن الناس رجعت لقت بيوتا خلا حتي المعالق شالوهن ما خلوا حاجة ما شالوها وبالذات ناس السكن العشوائي ديل والمفروض الحكومة تفرض هيبتة وتسيطر علي الموقف الامني وهنا يجي دور حس المواطن كمان مش المواطن عايز الحكومة تعمل ليهو كل حاجة، المهم ياحاج حمد، مجنون السوق ما كان مجنون كنا نحنا المجانين نحنا والله.. والحصل حصل وحقو بعد كدا نفتح عيونا كويس وتقيف الف احمر ضد اي زول نشك فيهو ونعرف اي زول جاي جديد كان في الحلة ولا في السوق عشان ما نتلدغ مرة تانية والبلد بلدنا ونحنا مع الجيش ولو مافي جيش معناها مافي وطن، ولا كلامي داا ياحاج حمد ما ياهو..
.. كلامك صااااح وما في كلام غيروا ولا بعدوا بس علي اللجنة الامنية تخت في حساباتا وضعية المجانين والمشردين والعشوائيات وحصر البيوت الفاضية وكمان اي زول عايز يؤجر بيت لازم يكون معروف للجهات الامنية.. جاي من وين وليه اختار الحي دااا ما نكون طيبين زيادة عن اللزوم ياحاج سيداحمد.
. كلامك صاااح ياحاج حمد اسع دا انا ماشي افتح بلاغ في قسم الشرطة والخلية الامنية اديهم اوصاف مجنون السوق بالكامل وانا بعد كدا ما خايف من اي زول تمشي معاي ولا مشغول..
… ما مشغول ولا حاجة ارح ومحل الرهيفة ينقد.. والقانون فوق الجميع.. وتاني مابنسكت تب.
(خمة نفس)
الموسم الشتوي طرق الباب، والصراع الخفي يدور مابين ادارة مشروع الجزيرة ووزارة الزراعة والري والمزارع يضع يده علي خده في انتظار النتيجة ولمن سيكون الفوز والانتصار ..
(خمة نفس)
هل سيضع بقال رجله علي ارض السودان.. سنري.
شعب واحد جيش واحد
