السكة حديد.. قطارات.. محطات.. ورش.. بيوت وقطاطي السكة حديد.
السيمافور والمحولجي، ناظر المحطة، التابليد. حكمدار وعمال الدريسة، وعفش الناس الماشي يناهد بالكيمان..
الترمس والتسالي، والجنا جداد وسندوتشات الطعمية.
محطة.. وسنده.. سكك حديد السودان.. أهي البداية.
.. عمنا حاج سيداحمد من كريمة، شال صرتو وكعكو وموية الزير وتمرات بركاوي، ركب القطر قاصد أولادو في الخرطوم.
قال: “القطر نفخ واتحرك دق.. دق. أول وقفة جد كانت في نمرة 10، بعدها عطبرة.. ريحة الشاي والشفع الببيعو تسالي في الرصيف.
الليل كلو ماشين على صوت الحديد. وصلت الخرطوم الصبح، لقيت أولادي في الشباك وأنا في السلم.
بقيت أكورك ليهم.. وهم يردو ابوي.. ابوي”
وصلنا بالسلامة.. الخرطوم.. ناس كتار ماشين جايين.. جايين ماشين.. عوووك ودعلي ما معاكم ياناس وأم الحسين في ياتوا عربية.. القطر.. قمرة.. درجة أولى وتانية وتالثة ورابعة.. عربات الشحن.. والأخيرة.
.. والقطر ماشي المحولجي نزل السيمافور وسواق القطر سلم التابليد لي ناظر المحطة.. الطريق أمان وسليم..
من الخرطوم لمدني السكة عندها طعم تاني:
المسيد.. ود الترابي.. المعيلق ريحة القطن.. أبو عشر .. الحصاحيصا المحالج والزحمة..
لحدي ما وصلنا ودمدني
أهو قطر الصيانة وصل.. بس السؤال: هل دي بداية ولا آخر محطة؟
(خمة النفس)
زمان كان النقل الرخيص والأمان. شال قطن الجزيرة، وصمغ كردفان، ووصل الطالب لجامعتو والأب لعيالو.
اليوم الورش سكتت والقضيب صدأ، بس الحنين لسه شغال وصوت الصافرة لسه في أضاننا.
السؤال ما للهيئة براها.. السؤال لينا كلنا:
هل حنرجع نسمع تاني “دق.. دق” بطول السكة؟
ولا حنكتفي بالحنين ونقول: “سكة طويلة.. القطر صفر.. انت في شباك وأنا في سلم وانا بقول جاو جاو انت ما بسلم.. دق.. دق. قطر صفر.
. ولا نقيف في مدني وتكون آخر محطة لينا.. لا بديل للسكة حديد الا السكة حديد..
(خمة نفس)
شعب واحد.. جيش واحد.
