(خمة نفس) ــ عبدالوهاب السنجك ــ  حاج سيداحمد.. يا ناس حبل الكذب قصير ــ بعانخي برس

حاج سيداحمد زول نصيحة ما بعرف يلف ولا يدور. يجيك عديل ويقول الكلام دُغري، حتى لو تزعل وتقاطعو.. وتقطّعو” حتة حتة.”

هسي الجاب الكلام دا شنو.. يا جماعة؟

أقول ليكم، كان تزعلوا ولا تطرشقوا من الزعل..

..الجاب الكلام داا دعوة رئيس الحكومة د. كامل إدريس عشان 26 شوال قمح لي فدان واحد، وآخر تدشين قالوا.. وجوطة.. وفارهات.. وحرس.. مصاريف زايدة..

.. ليه كدا بس؟!! د. كامل فاضي للدرجة دي عشان يطلع فوق الدقّاقة ويشوف إنتاجية الفدان الواحد؟
طيب ما اختلفنا.. لكن هسي اختلفنا عديل كدا.

.. أقول ليكم.. قلتو للحكومة كم كانت تكلفة زراعة الفدان الواحد؟
… كلّمتوه إنو السنة البرد ما كان شديد؟

… قلتو ليهو موية الري وتطهير القنوات ما كانت موجودة؟

… قلتو ليهو.. دي حواشة زول عندو قروش وختّ الوراهو والقدّامو في الواطة؟

… دحين سألكم من أسعار مدخلات الإنتاج “يوريا وداب”؟

… ما سألكم من مصاريف التحضير؟
… كلّمتوه إنو المزارعين خسرانين وزراعة القمح بقت لعبة ملوص، ولازم الحكومة تقيف ألف أحمر في الموضوع دا وتدعم المزارع؟

… ليه ما قلتو ليهو الحقيقة تعال شوف باقي الحواشات والأقسام عشان تعرف حاجة وتعرف كلامنا كلو كضب في كضب..

… معقول يا دكتور بجلالة قدرك وانت رئيس وطن حدادي مدادي اسمو السودان يطلّعوك العالي وينزلوك بالدقداق.. يجيبوك لي حواشة سمحة وسنبلة شايلة شيل، وما يودّوك لي ترعة مقطوعة من الموية مليانة مسكيت؟

… ليه ما قالوا ليك تعال شوف مكتب المفتش الزراعي؟

…ليه ما قالوا ليك.. نحنا فاشلين.. والموسم فاشل..ما اظنهم قالوا ليك.. البنك مجهّز حالو عشان يقبض المزارعين الما ح يقدروا يسدّدوا المديونية..

أنا أقول ليك عدييل.. إدارة المشروع ساقتك بالخلا.. جابتك مفتّح ورجّعتك مغمّض..

…ومني انااا يااا السيد الرئيس تاني كان قالوا ليك تعال مشروع الجزيرة قول ليهم عشان شنو!! انتوا ما عندكم حاجة خالص..

… وكان قالوا ليك تعال دشّن ليك حصاد.. قول ليهم دي قديمة، العبوا غيرا…يا ناس حبل الكضب قصير.

(خمة نفس)
التحية للمهندسين والفنيين والعاملين بوزارة الزراعة والري..
زيارة وكيل الوزارة م. ضو البيت عبد الرحمن منصور وتفقده صيانة خزان سنار وبيارة السوكي ومينا أكدت بأن الرجل والرجال يطوّعون المستحيل. كنت ومن معي شهوداً على ذلك، زيارة فجائية لم يكن مرتب لها.. صيانة بوابات خزان سنار صناعة الكثير من قطع الأسبير محلياً.. طلمبات بيارة السوكي ومينا.. يجب توطين الأسبيرات محلياً لتمزيق فاتورة الاستيراد.. ما عدا توفير التيار الكهربائي لتشغيل البيارات حتى تغني الأرض فرحاً وإنتاجاً.. 14 ساعة ما بين خزان سنار وبيارة السوكي ومينا.. واقع ملموس لا حديث مغشوش.