(نقطة.. 1)
…جهاز المغتربين بالخارج تم إنشاؤه في عام 1998، وهو مسؤول عن تنظيم شؤون السودانيين العاملين بالخارج وتقديم الخدمات لهم. يهدف الجهاز إلى دعم المغتربين وتحسين ظروفهم المعيشية، بالإضافة إلى تعزيز التواصل بينهم وبين الوطن الأم.
طيب ما اختلفنا.. للكلام السمح دااا.. بس قول لي الجهاز دااا عمل شنو للمغتربين بالله عليكم!! .. ياجماعة حرام عليكم ماكفاية عليهم…. المغترب السوداني لو مخطط يشتغل سنة في الغربة يقعد سنوات وهو جاري عربات القطر…وكانوا شايلين الشيلة.. دعم الأسر وموية وكهربة الحلة والمستشفى والمركز الصحي، وخصوصا لمن المليشيا المتمردة استباحت الخرطوم والجزيرة.. ياجماعة خففوا عليهم الله يخفف عليكم..
والله كان على انا جيش موظفي جهاز المغتربين دااا اقول ليهم شكرا ليكم.. كفيتوااا ووفيتوااا خلاص نشوف ليكم شغل تاني.. المغتربين تعبوا خلاص والله.
(نقطة.. 2)
…جهاز حماية الأراضي الحكومية في ولاية الجزيرة (وسط السودان) ادارة من ادارات وزارة التخطيط العمراني،، كشر أنيابه معلنا بإزالة كل التعديات التي تقع على الأراضي الحكومية من دون مستند قانوني، الحاجة الكويسة دائما ما يعلن الناس بانوا الإزالة جاياهم.. لموا عفشكم ساااااكت ونحنا ما نجامل زول مشيد بيت ولا عمارة في أرض حكومية من دون أوراق رسمية.. تاني مافي عشوائيات ولا شريط من حول المدن… نقول مبروك..
(نقطة.. 3)
..هيئة مياة ولاية الجزيرة في كل المدن والقرى وبرضوا هي إدارة من إدارات وزارة التخطيط العمراني…مجهوداتكم كبيرة ومعاكم إدارة البنية التحتية والكهرباء.. بعد تركيب الطاقة الشمسية في أكثر من (4500) بيارة كدااا تكونوا مزقتوا فاتورة استهلاك الكهرباء.. طيب عليكم بمتابعة سداد الفاتورة من الأحياء والقرى..لتقديم الخدمة الممتازة…وكمان يكون حق الطاقة رجع.. وبعد دااااك التوريدة تكون من دون أي خسارة.. ولا مش كدااا ياهندسة.
(نقطة.. 4)
..شارع السكة حديد من تقاطع البحوث الزراعية…جنوب الشارع.. ايه دااا ياناس.. كل يوم راكوبة جديدة.. وقطع غيار عربات (تشليح)…الحاصل شنو..
(نقطة.. 5)
..الما عارف حاجة احسن يسكت سااااكت
.. قضاة المحكمة العامة بودمدني يعملون بصمت ومن أمامهم اكثر من (80) قضية يوميا…يجلسون لساعات طويلة.. وهم مابين سماع المتحري محامي الاتهام والدفاع..تطبيقا للقانون وميزان العدالة بعيدا عن العاطفة…
والما عارف مايدور في تلك القاعات احسن ما يقدح في نزاهة القضاء والقضاة.
