(خمة نفس)ــ عبدالوهاب السنجك ــ الرقص من تحت فقاقيع الصابون.. والجن هو ذاتو معانا ــ بعانخي برس
بعانخي برس
بعد ما لعبت بيهو الحياة والشيطان لعب بيهو، قال احسن انتحر فكرة كدا وقعد براهو، شاف الحكاية صعبة وحرام.
ما لقى ليهو سبيل غير يفتح ماسورة الدش على جسدو.. ويكب كميات كبيرة من الصابون..صابون غسيل ملابس صابون غسيل عده المهم صابون، رغوة الصابون يتطاير في شكل دوائر.. دوائر بتلمع وتتلاشى ” تتفرقع” .. وهو يرقص من تحت الفقاقيع ويغني بصوت أجش:
مالكم علي
الدنيا دايره بي
أنا سويت شنو
أنا خليت شنو
مالكم علي
الدنيا دايره بي..
يمضي ساعات وهو في الحالة دي.. لحدي ما يطرقو عليهو الباب:
– يا زول ما تمرق.. يمرق جلدك.. انت جنيت؟!
الجن اليجننك
يرد وهو لسه يرقص تحت الموية والصابون طاير يمين وشمال.
– أنا ما جنيت.. لكن ياهو الجن الجننا ذاتو.. ما خلاص جنينا؟!
– فقدنا العندنا والعلينا.. هو تاني باقي فيها جن؟!
– الجن ذاتو ساب البلد دي ومشى، كان كل يوم نحنا عندنا أزمة جديدة.. أزمة سياسة.. أزمة ضمير.. أزمة وقود.. أزمة دقيق وأزمة تشاكُل وأزمة..
– وأزمة فوق أزمة..
لكن سبب الأزمة منو.. ماهم ذاتم تماسيح البحر، يبيعوا السمك جوا الموية.. تقول لي باخرة بترول.
ما قلنا الجن سافر.. طلع ما سافر!!
طلع قاعد معانا.. ساكن معانا في نفس الأوضة.. ياكل معانا ويشرب معانا..
هو ذاتو.. هم ذاتم..!!
الجن لقيناهو قاعد في صف العيش.. واقف في صف البنزين.. راكب معانا في الحافلة مدفوس دفسي.. في كرسي المدرسة في المستشفى..
قلنا ليهو: يا جن.. انت ما قلت سافرت؟!
قال: أسافر وين؟!
أمشي وين أخليكم؟!
انتو بقيتو تجننو أكتر مني.. بقيت أتعلم منكم!!
قال: زمان كنت أنا البخوف الناس.. هسه بقيت أخاف منكم انتو.. زمان كنت بخش في الزول أجننو.. هسه الزول يخش فيني يجنني أنا ذاتو!!
وقال: شوف.. أنا قررت أبقى مواطن سوداني عادي.. أطلع لي رقم وطني وأقعد معاكم هنا في الخمة دي وأخم زي الجماعة الخامين البلد خم..
قلنا ليهو: مرحب بيك.. كده بقيت واحد مننا.. ومنهم كمان خم ساكت.. ما اصلنا مخمومين من زمان.
بس الفرق الوحيد.. انت جنّك ظاهر.. ونحنا جنّنا مدسوس تحت فقاقيع الصابون.. نرقص بيهو ساي وما زول حاسي بينا!!
وقالوا الجنون فنونََ.. ويابختك..
خمة نفس أخيرة
جيش واحد..
شعب واحد..
