ولد ولا بت ؟
زمان جارتنا اسمها شامة.. كانت انسانة طيبة شديد زووولة فى حالا وكانت متزوجة حاج(ابو عوة) ودة لقبو …لانو بتاع مشاكل بس هو اسمو صديق…كان راجل صعب جدا بعكس زوجته..ودايما بس يصدر أوامر وزول ما ينفع معاهو الكلام الواعى الهادئ…ودايما شايل عصاية خيزران ينزلا على ام راس كل من يحاول مجرد النقاش…
كانت شامة عندها تلاتة بنات وحامل…وكل مرة راجلا يهددا لو ما جابت المرة دى ولد خلاص تطلع من بيتو للابد…وهى انسانة يتيمة وما عندها زول قريب شديد…قال ليها..
(يعنى امك و ابوك ديل يموتوا ويدبسونى فيك ؟ انا ولدتك ونسيتك ؟.. )..
يوم الصباح حست بالم الولادة…رسلت بتها نادت الداية…وبقت بس تقرا فى القرآن وتنده الفقرا…جا هو طالع على السوق ..دخل ليها فى الأوضة…
اسمعي يا ولية…انتى عارفة الليلة لازم تولدى ولد…الكلام دة وقع ليك ولا لا ؟ ولد يعنى ولد …بت…لا بت شنو ؟
ردت بصوت ضعيف ..(لا)..
أيوة خليك فاهمة كويس لو جبتى بت انتى طلقانة…انتى شنو ؟
ردت براحة..(طلقانة…)..
خلى بالك كويس من الكلام دة ..
واتجه لباب الخروج قابل (الداية)…
…اسمعى يا حاجة سكينة…المرة دى الليلة تجيب ولد…
…..هى نان يا حاج…
….. حاج فى عينك..ما تردى …انتى تقولى حاضر وبس.
ورفع عصايتو الخيزران…سكينة خافت وبقت تتمتم…حاضر …ححاضر…
…والله الليلة تجيب بت الا ازين ليك شعيراتك العاجباتنك ديل..
.بت يا سميرة..
هوى يابا..
امك لما تولد ولد تجى تقولى لى فى السوق. .بت لا…
وطلع وخبط الباب…
بعد الولادة …
ذهبت سميرة للسوق …لقت ابوها قاعد وسط اصحابو…كانت خايفة شديد جدا…مما شافا كورك ليها..
يا بت..امك ولدت ؟
..اى يابا ..
جابت ولد ؟
هزت رأسا نفيا..لا ..لا.. يابا..
نان جايانى ليه ؟ جابت بت ما كدة؟
هزت رأسا نفيا…لا..لا..يابا..
طيب جابت شنو ؟ شيطان ؟
رفعت اصبعين وقالت.
جابت بتين يابا….
ثم أطلقت ساقيها للريح…..
