(خمة نفس) ــ عبدالوهاب السنجك ــ ستة بقوا عشرين.. حرب الأرقام في قروبات الواتساب!! ــ بعانخي برس

يا ناس.. الحكاية شنو؟!
خبر واحد شايلنو عشرين وكل زول شايت براهو!!

ورقة وقلم.. ممكن يا أستاذ تصريح بمناسبة الزيارة؟!

جداا.. مافي مشكلة!!
طيب رقم تلفونك كم عشان نرسل الخبر بعد النشر.. وانت عارف الوضع..
يتبسم وهو يقدم صكوك الغفران الاقتصادي..

.. مش مشكلة كل حاجة ليها حل ما تشيل هم..
خليك معانا في نشرة الساعة تسعة مساءً وحا تلقى الخبر في عدد من المواقع الإلكترونية.

ايه الموضوع بالضبط!!
واحد يقول ليك 6 رسميين..
التاني يزيد البهار: لا عشرة متعاونين..
التالت يصحى من النوم يلقاهم بقوا عشرين.
والرابع يركب ليهم صور قديمة من 2023 ويقول ليك ديل هم!! كلهم عندهم حوافز شهرية من غير ” الكروبات والغمتة الخارجية”

الحكاية شنو؟! خبر واحد.. لا مصدر.. لا بيان.. لا أسماء.. وكل القروبات تنسخ وتلصق..
زولنا قاعد رجل فوق رجل، يشيل ويلصق..
الو.. الو.. هاك يا أستاذ الخبر نشرناه في كل القروبات.. تصدق خبر حا يهز البلد هز.. بس ما تنسانا من فضل الدعوات ورقم حسابي معاك..ما تنسى ضروري الاولاد مسافرين بكرة لانو المدارس قربت تفتح.

نقيف هنا:
يا ناس.. نحن تعبنا من الحكاية دي بقت الإشاعات أكتر من حرب المدافع.. الرسمي 6 يبقى 6.. ما تبقوهم 60 عشان اللايكات.

عايزين تشتغلوا صحافة؟! اتعبوا شوية جيبوا:
كلام المسئول ما تفكروا في الحافز فكروا في حل المشكلة.
او بيان من لجنة أمن الولاية أو النيابة
وأسماء معتمدة عشان يكون الشغل واضح بالمستندات.

غير كده ده اسمو تضخيم وخلق بلبلة.. والمواطن المسكين يبيت قلقان ساي.

الخبر البزيد موية.. بغرق صاحبو قبل ما يغرق الحقيقة..
ومرات يكون مضروب ولا فيهو ريحة ابتزاز وممكن يكون خبر “زبالة” الله يكرم السامعين..
الصحافة بقت مهنة من لا مهنة له..
رايكم شنو!!

خمة نفس اخيرة:
جيش واحد..
شعب واحد..