اللهم ارحم واغفر للمشير جعفر محمد نميري..
الزول ما كان بعرف الراحة ولا السكون والركون، تلقاهو من مكان لي مكان يفتش في حال الغبش والمساكين، تلقاهو في المكاتب مع الموظفين والعمال ، ما بعرف يجامل الوزراء وحتى العساكر.. انضباط فوق الانضباط، لكن الجماعة ما خلوهو وخلونا كمان.
واليوم شايفين صورة النميري في البرهان.. مع الجماهير، مع ست الجبنة والشاي، مع أم الشهيد، في المصانع قاعد على كرسي بلاستيك بسأل: ليه المصانع ما عندها صوت ولا حركة؟!
الإجابة: كهرباء مافي يا سعادة الفريق.. عشان كدا المصانع متوقفة ونحنا قاعدين عطالة
.. نادوا لي مدير الكهرباء.. أسع أنا قاعد هنا مش متحرك شبر إلا أعرف السبب شنو!!
ياسعادة الفريق قروش مافي والتكلفة عالية وانت عارف الخراب كان كبير.
.. القروش تجيك اليوم.. انتوا حا تصلحوا الكهرباء في كم يوم؟!
– عايزة شهر يا سعادة الفريق.
– شهر ليه.. أسبوع واحد بس، عايزين الكهرباء داخلة مصانع بحري.. انتهى الكلاااام.
مننا ليك ياسعادة الفريق، بس والله لو جيت ولاية الجزيرة وقعدت معانا اسبوع واحد وشفت حالنا وحال المشروع يكون كويس، لانو الكلام كتير وشيخ المشاريع بموت في اليوم ألف وألف مرة.. تعال شوف براك حال الترع والقناطر الماعندها وجيع والمسكيتَ والحشائش والطمي، الموسم الصيفي ضربو العطش والموية راقدة في خزان سنار، ما قلنا حاجة لكن وصلت قسم التُحاميد وشمال الجزيرة وكبري الخشب نقول ليك طبعاً لا.. وهسع داخل علينا الشتوي، تعال شوف براك أحسن ما يقولوا ليك لأنو التقارير بتكون مضروبة هوا ساااكت ياسعادة أرقام وفعل مافي.. تعال اسمع من المزارعين ما من الموظفين والمهندسين والجماعة اللابسين الجلاليب ولافين العمم ومراكيب النمر.. تعال شوف حاج أحمد يفتش في الموية من أبو عشرين كان لقاها ما يلقى الجاز.. تعال شوف القطن يبس والعيش نشف.. تعال براك.. بيوتنا مفتوحة ليكم ويدنا مع يدكم.
ونقول ليكم: اها الزول يتقطع ليكم يا حكومة الأمل..وين وزير الزراعة مش كان احسن يرحل المكتب لي بركات ويتابع حال المشروع.
وانتو منو فيكم زار المنطقة الصناعية بحري يا رئيس مجلس الوزراء ويا وزيرة الصناعة وشاف حال المصانع دي وشاف حال العمال البفتشوا في حق فتة الفول كان لقوها؟! ما أصلو أصحاب المصانع الأغلب منهم رحل وسافر برا البلد وحول استثماراتو لبلد تانية.. ليه؟! علشان مافي كهرباء..بالله عليكم قعدة الفريق البرهان على كرسي بلاستيك ويسأل عن سبب عدم تشغيل المصانع مش تخلي الواحد فيكم يقدم استقالتو.. والقضية كلها كهرباء..
وانتو عارفين الصناعة هي الأمل.. والمصانع إذا اشتغلت، البلد بتشتغل، والعمال بيرجعوا، والسودان بيرجع.
خمة نفس أخيرة:
النميري كان بمشي للناس في محلهم.. والبرهان الليلة بعمل في نفس الحاجة.. فهل تفعلها حكومة الأمل وتكمل المشوار؟!
ولاتقعد تحت الهواء البارد.
داا كلامنا ليكم منتظرين ردكم بالفعل ما بالكلام والهتافات.
شعب واحد جيش واحد
