(خمة نفس) ــ عبدالوهاب السنجك ــ البلد سكرانة.. تقوم وتقع وقايله روحها اتشلت!! ــ بعانخي برس

قال ليك واحد أول مرة يسكر.. ماشي في الشارع يقوم ويقع.. يقوم ويقع..

جا زول داير يساعدو قال ليهو: قوم يا زول انت سكران!!

السكران قال ليهو: الله يطمنك.. قايل روحي اتشليت!!

اها القصة دي.. هي بالضبط وصف لحالنا العام الآن..

نحن كشعب.. كحكومة.. كولايات.. ماشين نقوم ونقع.. نقوم ونقع..

الدولار يقوم ويقع.. المواصلات تقوم وتقع.. الكهرباء تقوم وتقع.. والمواطن يقوم ويقع..

وكل مرة نقوم فيها.. نقول: الحمد لله قايلين روحنا اتشلينا.. لكن طلعنا سكرانين ساي!!

سكرانين بشنو؟!

سكرانين بالوعود..

سكرانين بالخطابات الرنانة..

سكرانين بلجان انبثقت من لجان.. واجتماع فوق اجتماع!!

سكرانين بقرارات بتطلع الصباح وتتنسي بالليل..

الحكََومة تقول ح نغير الحكومة.. َوتقوم وتقع.. المواطن يسمع الخبر يقوم ويقع.. وفي النهاية يطلع الخبر كان سكرة وفرحة ساااكت!!

نضبط شحنة مخدرات َوبنقو.. ونصفق.. وتاني نضبط .. طيب معناها شنو؟! معناها السكرة لسه ما فكت!!
ولازم نكون صاحيين.

نقبض تناكر جازولين مهربة.. ونعمل محكمة.. وأزمة المواصلات لسه تراوح مكانها.. يعني المواطن لسه واقع في الشارع.. ويقوم ويقع!!
ونقول الحل جاي في الطريق!!

نحن ما مشلولين يا جماعة.. نحن بخير.. عندنا جيش.. عندنا شرطة.. عندنا أمن.. عندنا رجال شغالة ليل نهار زي ما شفنا في الضبطيات..

المشكلة بس.. نحن سكرانين وما عارفين سكرانين بشنو!!

المواطن داير زول يجي يقول ليهو: قوم يا زول انت ما مشلول.. انت بس سكران بالفرحة فوق لوعيك!! وخليك صاحي.

داير حكومة تصحيهو.. ما حكومة تزيد سكرتو!!

داير قرار يفوق.. مش قرار يدوخ!!

خمة نفس أخيرة:

السكران الأول لما عرف روحو سكران اطمأن..

ونحن كمان.. لو عرفنا مشكلتنا الحقيقية واعترفنا بيها.. بنطمن.. وبنقوم فوق..
ولو سكرانين صاااح بيفوق ونصحصح وما بنقع!!
جيش واحد..
شعب واحد..