*شاهيناز القرشي*
هل مفروض العالم يسمح باستخدام الكيماوي ضد الاعداء بلا استثناء؟ يعني روسيا تفك كيماوي وترتاح من غاغة الاوكران؟ الهند تضرب باكستان قنبلتين ويا اقليم كشمير مادخلك شرير، امريكا تضرب إيران كيماوي؟؟ إسرائيل؟ ديك اسكت خليها مابجيب سيرتها انت عارف وانا عارفه والله عارف، ولا انت شايف العالم يقول لا لا لا *مسموح للجيش السوداني فقط يستخدم الكيماوي ضد الدعامة؟*
طيب ماسألت نفسك سؤال ماذا لو حصل العكس؟؟ ماذا لو امتلك الجنجويد سلاح كيماوي؟ ماتقول لي هم ميليشيا وما حكومة ودي جيوش رسمية ورجغ ورجغ ورجغ، هم الآن بمتلكوا سلاح حق حكومات وجيوش رسمية ومدورين به الحرب، والسلاح دا الان مامذكور اصلا بتذكر اثاره، يعني ماحصل لقينا ادانة لعدد المسيرات ولا الهاونات ولا الهاوزرات بنلقى ادنة لعدد القتلى بينما السلاح الكيماوي لو امتلكته سااااي بجيب ليك التهم.
*ماذا لو استخدم الدعامة الكيماوي؟* وبالمناسبة انا عندي قناعة انهم ما لموا في الكيماوي بس، لو لقوا كانوا بخروا البلد دي من كرري لبورتسودان بخور تيمان تقيل، يطرد الشيطان من وجهة نظرهم، ماهم ابناء رحم الجيش اولاده عديييل نفس الاخلاق، في هذه الحالة هل مفروض العالم يكون عنده مشكلة مع الدعامة ولا ما مفروض؟؟
الحاجة التانية الكيماوي دا ماحبة بتديها للدعامي يبلعها وبتهرد مصرانه ويموت، دا غااااز او بخور زي ماقلت ليك يعني بمشي مع الهواء وبتنفسوا كل المحيطين بالمنطقة، وبعد ياخد لفته بنزل وبستقر في الارض ،ممكن تاخد مثال للعملية دي من رش المبيدات الحشرية عبارة عن مادة بتترش بالطيارات بتنزل الارض وتقتل الحشرات في الزراعة، المبيد الحشري مابقول حا اقتل ابو الجندب واسيب الفراشه، بقتل من طرف ومن النص وبالجبنبات، الكيماوي بعمل نفس العملية دي. وبتختلف المدة الباثر فيها السلاح الكيماوي على الارض والانسان حسب نوع السلاح، والمواد المستخدمة والتفاعل مابين المادة الكميائية والرطوبة والمواد العضوية في الارض، يعني انت بعد تطرد الدعامة بترجع تزرع وتسكن وتجيب اطفال في نفس المكان دا، وبتاكل وبتشرب من الموية المتاثرة بالمادة القتلت الدعامي، اااي مابتموت طوالي لانو انت بتاكل كميات قليلة على مدة طويلة لكن بتظهر السرطانات والاطفال المشوهين والامراض التنفسيه والغريبة، لذلك العالم حرم الكيماوي لانه بخرج عن السيطرة غاز وماشي حر حسب الهواء ، بس عليك الله اقيف عند سؤال ماذا لو امتلك الدعامة كيماوي؟ انت عايزالسلاح دا يكون محرم والشخص الماسكه وبستخدمه مهدد ولا عادي؟؟
الحاجة التانية انت ككوز لمن تجيب الكيماوي وتستخدمه وتخش في عقوبات ومشاكل لانك ارتكبت جريمة، القحاتي يدس ليك ليه؟؟ ما هو العمل الجريمة دي ما السودان البلد ولا الشعب السوداني دي فئة محددة مجرمة دخلتنا في ورطة ، نحن كسودانيين لا شاورتونا لا سألتونا تاكلوا ناركم وتشربوا غازكم.
