(خمة نفس) ــ عبدالوهاب السنجك ــ هل نجد ما بين الملفات المبعثرة ما نبحث عنه؟!! ــ بعانخي برس

أوراق مبعثرة هنا وهناك..
وأقدام تحاول القفز من حولها.

الدولار يقفز لأعلى مستوياته، وكلهم يقبضون على صدورهم خوفاً من نوبة ذبحة صدرية.

كل شيء غريب، حتى أنت وأنا غرباء.. لا شيء يجمعنا غير الحديث عن الدولار وسوق طار السماء..

بعضهم يبيع ولا يدري إن كان ذلك صواباً أم خطأ.. أي تجارة وبيع حظ بس.
وذاك أغلق متجره خوفاً من الخسارة، لعشان ما يفقد رأس المال..

الحكومة تخسر.. التاجر يخسر.. المواطن يخسر ألف مرة.. ومرة.

ولاة ولايات مكلفين، وما بقدرو يقولوا للحكومة للمركزية “تلت التلاتة كم؟”

ملف طالع، ملف نازل.. قلم أسود توقيع والي.. ، وقلم أخضر توقيع وزير،.. وثالث أحمر توقيع مدير عام للوزارة..
الحصيلة؟ “تعال بكرة”..

ولاية الجزيرة.. المحليات تقبض على ملف التنمية، من دون تنمية ماتقولوا “لقد داهمنا الخريف”

كلمة تعال بكرة.. والبكرة بقت أطول ، والملفات بقت أكتر وهل سنجد مابين الملفات المبعثرة ما نبحث عنه..؟!!
ونحن واقفين في النص، بين سعر ما بنقدر عليهو، وقرار ما شايفنو، وأمل كل يوم بنأجله لبكرة.

(خمة أخيرة)
لما تبقى الدولة كلها ملفات مبعثرة، ما بنلقى فيها نفسنا. بنلقى فيها بس خوفنا ويأسنا..

ولحدي ما نرتب الأوراق دي، الدولار لسه قاعد يرقص، ونحن لسه قاعدين نقبض في صدورنا.

موظفين مش عارفين يحلوها كيف!!
لكن الحل مع “ابوالعريف” كونوا لجنة ومن اللجنة تنبثق لجنة و الانبثاق يكون الحل هو حافز وجنيهات تقيكم شر الفقر والعوز.

دااا بلعب صاح وعارف الوالي والوزير عايزين شنو؟!
وجبة فول زيت وملح ورغيفات بقت مابتصاقع احسن اقرض عيشة مع وكباية شاي وكدا “خمة النفس” تخف شوية لانو ما بتقدر على داك.. وداك..

.. وآخر عظمة الله يدينا العظمة عشان نوري الياهم ديلك ناس الملفات المردمة الميتة لانو ما ممكن تتحرك الا بدفرة والدفرة “خارج نفسك” معروفة لصاحب الحاجة “في الحاجة تكمن الحرية وفي الحرية تكمن السعادة”
والسعادة بقت الا” كاش داون” كان تفهم يازول.. لكن برضوا ماشين ما ح نقيف الا تجيب قون من خط ستة..

وتجي ناط لي تقول لي “اصبر”.. نصبر على شنو؟
على السوق الجاري ، ولا على مواصلات بقت بـ”مزاد علني”؟
الموظف بقى يحسبها بالورقة والقلم: يفطر ولا يركب؟ يعالج الولد ولا يسدد الإيجار؟ الاولاد يمشوا المدارس ولا يقعدوا في البيت!!

والإجابة دايماً: “الأسبوع الجاي بنشوف ليكم حل جذري”
والحل الجذري طلع لجنة.. واللجنة ولدت لجنة.. والولادة القيصرية دي جابت لينا قرارات زيادة في كل شئ!!

لكن برضو بنضحك..
بنقيف قدام الفرن صباحاً ونحكي عن الكورة وكأس العالم.
بنشرب الشاي بالنعناع ونقول “الحال بمشي”
لأنو لو ما مشى برجلينا، ح نمشي بكرامتنا.

(خمة أخيرة أخيرة)
ما دايرين وعود في ملفات.. دايرين رغيفة في يد، ودواء في صيدلية، ومرتب يجي قبل نص الشهر.
الدولار يرقص براهو، لكن نحنا ما ح نرقص معاهو.

حنقيف، ونعدل الورق المبعثر دا برانا، ملف ملف.. لحدي ما نلقى نفسنا بين السطور.

والقال “تعال بكرة” نقول ليهو: بكرة جات.. وين حقنا؟!
وعد الحر دين عليه..

(خمة نفس)
شعب واحد.. جيش واحد.