خمة نفس ــ عبدالوهاب السنجك ــ ما بين ضبطية تناكر جازولين والف ألف رأس بنقو في ولاية الجزيرة.. تعظيم سلام للأجهزة الأمنية!! ــ بعانخي برس

زمان كان المثل بقول: لو عايز تعرف البلد ماشة وين.. شوف بوليسها وين!!

واليوم.. ولاية الجزيرة بتقول كلمتها.. البوليس صاحي.. عيون مفتوحة ما بتعرف النوم.. والمكافحة صاحية..بالخبرة تشمها طايرة..
والاستخبارات تعرف بالحاسة والنظرة الواحدة والمخابرات دااا كلام تاني .. ودرع السودان في كل مكان في الوطن للوطن.

يعني باختصار.. البلد فيها رجال يهزو ويرزو!!

قبل يومين.. تنكرين جازولين مليانين فل.. شغالين فيهن بيع سوق أسود في أحياء مدني.. البرميل بي 4 مليون ونص.. في عز أزمة المواصلات.. في عز ما المواطن واقف في الشمس منتظر حافلة ما جات..في عز حاجة المزارع لي جالون واحد عشان المحصول ما يعطش ويحرق.

الناس ديل كانوا بيمصوا في دم الغلابة.. يشيلوا الجازولين ويبيعوه بالسعر الفاحش..مفكرين البلد سايبة.. وقاعدة “طرشي”

لكن مباحث التجارة والتموين كانت ترصد وتتابع.. ومعاها النقيب مهند النور علي من قوات درع السودان.. كبسوهم متلبسين.. حالة تلبس عديل.. لا قالوا ليك إشاعة لا قالوا كلام واتساب..وعلى المحكمة بلاغ استمارة وبس!!

والمحكمة قالت كلمتها.. غرامة 50 مليون لكل واحد.. ومصادرة الجازولين لصالح إدارة البترول ولاية الجزيرة..مافي كلام بعد قرار القاضي، الحكم لقى استحسان كل مواطن شريف في ولاية الجزيرة..

هيا نمشي للتقيل.. والتقيل قدام.

أها 16 ضبطية مخدرات حبوب مخدرة وبنقو متهمين مابين الإدانة وآخرين عند الانتظار، وأمس القريب ضبط ألف قندول بنقو جوه تاكسي ماشي سنار بالظلط..

تخيل.. تاكسي أصفر ماشي في الشارع زي اي تاكسي.. جواهو ألف قندول بنقو.. يعني ألف شاب كان ممكن يضيع.. ألف أسرة كان ممكن تتدمر وجاتكم يامصحة الأمراض النفسية والعقلية.

لكن مكافحة التهريب.. بالتنسيق مع الاستخبارات والمخابرات.. قالت ليهم: أقيفوا هنا.. اللعب انتهى!!
والحكم صفر بإعلان النتيجة لصالح الأجهزة الأمنية.
ضبط16 شحنة متنوعة ما واحدة ولا اتنين.. 16 شحنة في فترة وجيزة.. ده معناهو في شغل.. في تنسيق.. في غرفة عمليات شغالة ليل ونهار.. متابعة ورصد.. نوم مافي عشان ينوم المواطن.
الف قندول مرة واحدة يا عالم.. مبروك والله
وتعظيم سلام لمدير شرطة الولاية اللواء عبد الإله علي أحمد.. تعظيم سلام للعميد أحمد الطيب الفضل مدير مكافحة التهريب ورجالو.. تعظيم سلام لأي عسكري سهران عشان نحنا ننوم مطمئنين..

الوالي الطاهر إبراهيم الخير وقف في الضبطية وقال: الشرطة هي الحامي.. ونحنا بنقول ليهو: صدقت.. الشرطة والأمن والجيش والدرع.. كلهم الحامي.. ومن قبلهم الحامي الله الجليل الرحيم البصير.

رسالتنا للمجرمين..

ولاية الجزيرة ما هاملة.. الجزيرة رجعت.. والمحاكم رجعت.. والشرطة رجعت.. وتاني مافي سوق أسود.. ولا تاكسي بنقو بيمشي سنار.. ولا تنكر جاز بتباع بالدس والسوق والأسود.

والرسالة للمواطن.. بلغ.. لو شفت تانكر واقف في مكان غريب.. لو شفت حركة ما طبيعية.. بلغ.. انت شريك في الأمن..

خمة نفس أخيرة:

لما الجازولين يمشي لي سيدو.. والبنقو يتباد قدام لجنة الأمن.. نقدر نقول: الجزيرة تعافت.. والحمد لله..

وتعظيم سلام للأجهزة الأمنية كافة.
جيش واحد.. شعب واحد..