قالوا لينا الحكاية دي:… في واحد جا سكن في حِلتنا جديد اسمو احمد الفنان والناس شابكنو ليك” احمد الفنان احمد الفنان” .. اها في واحد والحفلة قاجة مدورة… قال احسن ادخل أحمد الفنان يغني لينا كمان ، قام مسك المكرفون بأعلى صوت الان نقدم لكم أحمد الفنان، طبعا مشتاقين عايزين تسمعوهو، الناس ألفي الحفلة صاحت وصفقت لي احمد الفنان.. وهاك ياتحنيس قوم غني ليك فاصل واحد يااا أحمد قوم عليك الله، عايزين نسمع صوتك الجميل، طالما انت مشهور قدر دا يااا أحمد.. وكان رد أحمد صادم ( انااا ياجماعة ما فنان وما بعرف اغني ولا حاجة انا زول ساااااكت)
قالوا ليهو طيب ليه سموك احمد الفنان ليه!!
قال ليهم انا سموني أحمد الفنان عشان” التمراية لمن تكون بعيدة في آخر السبيطة بفنها بالحجر بجيبا ليكم في الواطة) عشان كداا سموني الفنان..
.. دااا الكلاااام يادكتور كامل ما تلحقنا أحمد الفنان ..
انت تم تعينك في مايو 2025م في ظل ظروف سياسية واقتصادية معقدة.. ما قلنا حاجة.. ومعاك خبرة دولية وأكاديمية مرموقة واسعة، لكن يا دكتور دا كلوا مرهون بقدراتك وتوظيف خبراتك، بس ما شفنا حاجة حتى الآن.. لانو ما قدمت رؤية اقتصادية واضحة لاستغلال الموارد وكمان الاستفادة من علاقاتك الخارجية، صحيح كلنا عارفين مواقفك التاريخية مع المعارضة ودي كانت سبب في قبولك شعبيا وان رأي البعض بأن تعيين د. كامل خطوة استراتيجية لإدارة الأزمة السودانية التي تقف في مكانها من دون تقدم واضح..
وان كان الفنان أحمد كان صادقا في حديثة انه (فنان تمراية ساااكت) ليه ماتكون يااا دكتور زي أحمد فنان تمراية، بدل ما تخم نفسنا ساااااكت.
.. انت تعرف وكان عايز تعرف، انو الحكاية ماشة للخلف بسرعة، والمواطن بقى في وضع لا يحسد عليهو.. آخر “ململة” يعني مافي جديد ولا حتى امل كل يوم مختلف عن اليوم التاني…اهااا لو دقينا الطربيزة قلنا ليكم لمتين حا نكون كدا وعلى الحالة دي!!
حا تقولوا لينا شيلوا الصبر..
المهم ياااا دكتور كامل احسن تكون صريح معنا زي ما كان الفنان أحمد واضح مع جماهير الحفلة.. ماهو” فنان تمراية” وبس.. ما زول غنا ولا بعرف يغني.. ودا العندنا ليك..
(خمة نفس)
انتقادات قوية في وجه الجهات الممولة لمزارعي مشروع الجزيرة تمثلت في السعر التركيزي لمحصول القمح، إدارة مشروع الجزيرة عندها كلام..والبنوك ليها رأى آخر، والمزارعين ليهم حق لأنهم عارفين تكلفة الفدان، ووزارة المالية قاعدة تتفرج.. منتظرة البقع منو فيهم..!!
والمواطن الترابة في خشموا اصلوا حيكون خامي نفسواا طول حياتوااا.
