..
نزف التهنئة لكل الوطن.. بأعياد الاستغلال، كل عام وانتم بخير، وندعو الله أن يثبت أقدام قواتنا المسلحة دحرا لاؤلئك الخونة الفاسدين.
(نقطة 1)
حكومة ولاية الجزيرة (وسط السودان) فكرت وقدرت وعاينت جاي وجاي.. عندها باقي قريشات.. قالت نعمل بيهن شنو.. عشان ما يخشن في السنة الجديدة… هاك ياولد شيل شعار الولاية (لوزة القطن) من على سور الولاية وجيب حديد مقدد ساااكت،.. وتمت اللعبة.. مش كان من الأفضل القريشات ياحكومة الولاية لي مستشفى السرطان ولا الأطفال ولا الكلي..وتخلوا القطنة قاعدة في محلها.
(نقطة.. 2)
(4500) محطة مياة تعمل بالطاقة الشمسية توفر (25) ميقاواط من الكهرباء للسودان…يعني كدا ناس الكهرباء ما عندهم حاجة للفاتورة الموية.. بس عندهم أجر المناولة…شمس بس موية مدورة لا قطعت الكهرباء ولا جات..َنبارك الخطوة…وزير التخطيط العمراني ومدير إدارة البنية التحتية والكهرباء والفريق العامل.. كفيتوا ووفيتوا.
(نقطة 3)
يامحلية ودمدني.. بل يا كل المحليات والإدارات الصحية…الحلاق جنب المطعم، والمطاعم وسخانة، والحشرات (الجعارين والنمل) تتفسح زي ما عايزة.. لمتين نطلع من امراض الاسهالات والمغص. َ. “مغصتونا مغص)
(نقطة.. 4)
عمنا أحمد يقف في الشوارع المزدحمة بحركة المرور (تقاطع صيدلية الخير..و المدرسة الشرقية مع المسرح) ينظم الحركة بطريقتة الخاصة،.ليجد الإشادة من قائدي العربات والمواطنين.. لك التحية من عندنا.. ونشوف مدير شرطة ولاية الجزيرة يقول شنو!!!
(نقطة..5َ)
ناس الأراضي الحكاية شنو.. توزيع خطط إسكانية ليها سنوات من دون خدمات لا موية ولا كهرباء، ورق واختام بيد السماسرة في السوق.. لمتين كدااا..
(خمة نفس)
مواقع استثمارية في وسط اسواق المحليات يتم بيعها عن طريق المزادات بملايين الجنيهات لكن المشتري مش مفكر من يشيد الان ليه.. عايز يسمسر فيها ويكسب من وراها…لازم يكون في شروط واضحة من حيث زمن التشيد والبناء…مش بكرة نلقى القطعة الاستثمارية كلها رواكيب ودرداقات.. وحاجات كدااا مش تمام. َ
