مدني يا أجمل خبر، بقيتي أوجع خبر.
كنتي بتفرحينا، هسي بقيتي بتوجعينا.
كيف يا مدني بقى الشاب يطلع منك يتمرن وما يرجع؟
يطلع ضاحك ويرجع محمول؟
يطلع لأمه يقول ليها راجع، ويرجع ليها خبر موت؟
كيف يا مدني بقى الطفل ما آمن فيك؟
طفل لسه ما عرف الدنيا، يتوجع ويتظلم وهو ما عمل حاجة؟
مدني يا أجمل خبر، نحنا ما عرفناك كده.
عرفناك أمان، عرفناك طمأنينة، عرفناك مدينة بتلم وبتحن.
هسي بقينا بنسمع عنك وبنخاف، بقينا بنقرا أخبارك وقلبنا بيوجعنا.
بقينا كل ما نسمع خبر، نقول يا رب ما يكون ولدنا، يا رب ما تكون بتنا.
مدني يا أجمل خبر، ارجعي لينا زي زمان.
ارجعي أمان، ارجعي ضحكة، ارجعي طمأنينة.
ما عايزين نسمع عنك إلا الأخبار السمحة، زي زمان.
الله يرحم الشاب المات، ويصبر أهله.
والله يحفظ أطفالنا، ويحفظك يا مدني.
*لسه بنحبك، رغم كل الوجع ده
🖋️ميناس بكري
