سمعت الأستاذ الدكتور إسماعيل محمود محمد.. في الميديا.. وسكت..
سكت لأنو الكلام الكان بيقولو.. كأنو بيحكي عن السودان.. حرفاً حرفاً!!
قال: ألمانيا خرجت من الحرب العالمية الثانية مدمرة..
ورواندا خرجت من مجازر أهلية وفتنة قاتلة..
وسنغافورة ما كان عندها موارد..
لكن التلاتة اتفقوا على حاجة واحدة: الصراع على السلطة ما بيبني وطن!!
اها نحن وين من الكلام ده؟!
نحن عندنا كل حاجة.. عندنا النيل.. عندنا الدهب.. عندنا البترول.. عندنا مشروع الجزيرة.. عندنا أكثر من 200 مليون فدان صالحة للزراعة..عند ثروة حيوانية وسياحة، عندنا شباب زي الورد..
ومع ذلك.. متعثرين!!
ليه؟!
لأنو عندنا نفس المرض القالو الدكتور:
المصالح الضيقة بقت أهم من المصلحة العامة..الولاء بقى أهم من الكفاءة..
الشعار بقى أهم من الإنجاز..
ورد الفعل بقى أهم من التخطيط..
الدكتور قال: الانهيار ما بيبدأ من نقص القروش.. بيبدأ لما الولاء يبقى أهم من الكفاءة!!
ودي بالضبط مشكلتنا في السودان..وهي الحقيقة المرة.
تجيب زول ما بيعرف أي حاجة.. لكن ولاءو ليك.. وتخليه مدير.. وتخلي المهندس الشاطر قاعد في البيت!!
تجيب زول لأنو من قبيلتك.. وتخلي الكفاءة في الشارع!!
بعدين تقول: البلد ليه ما ماشة؟!
البلد ما ماشة لأنك انت الوديتها في الحفرة دي بيدك!!
ألمانيا بعد الحرب.. ما قالت: منو النتصر؟! قالت: كيف تنتصر الدولة؟!
رواندا بعد المجازر.. ما قالت: قبيلتي وقبيلتك.. قالت: كلنا روانديين.. ونبني بلدنا!!
سنغافورة ما عندها موية تشرب.. الليلة بقت من أغنى دول العالم.. ليه؟! لأنها عملت التعليم التعليمي وطني.. والاقتصاد مشروع وطني.. والكفاءة مشروع وطني!!
نحن.. التعليم عندنا بقى مشروع تجاري..
الاقتصاد عندنا بقى مشروع سماسرة..
والكفاءة عندنا بقت تهمة!!
الدكتور قال كلمة توزن دهب:
لا تسقط الأوطان عندما تختلف الآراء.. وإنما تسقط عندما تتفق على تجاهل الحقائق!!
ونحن هسي اتفقنا على تجاهل الحقائق..
الحقيقة إنو مشروع الجزيرة ممكن يأكل السودان كلو..؟ لكن بنتجاهلها!
الحقيقة إنو الخلافات السياسية ما بتشغل مصنع.. ولا بتطور جامعة.. ولا بتصلح طريق.. لكن بنتجاهلها!!
الحقيقة إنو مستقبل الأجيال ما بيتبني بخطابات الأمس.. بيتبني بخطط الغد.. لكن بنتجاهلها!!
وقال كلمة تانية أخطر:
لا تنهض الدول عندما يتغير الأشخاص.. وإنما تنهض عندما تتغير طريقة التفكير وإدارة الدولة!!
يعني ما تشيل فلان وتجيب علان.. وتقول غيرنا!!
لو نفس التفكير.. نفس الإدارة.. نفس الولاء على الكفاءة.. نفس الشعار على الإنجاز.. النتيجة ح تكون نفسها.. حتى لو غيرت 100 حكومة!!
خمة نفس أخيرة:
يا جماعة.. كلام الدكتور إسماعيل ده ما محاضرة ساي..
ده روشتة علاج للسودان..
روشتة فيها 3 أدوية بس:
1. التعليم مشروع وطني.. ما تجارة.
2. الاقتصاد مشروع وطني.. ما سمسره.
3. الكفاءة مشروع وطني.. ما ولاء.
لو بلعنا الأدوية دي.. والله السودان يقوم.. زي ما قامت ألمانيا من الرماد.. وزي ما قامت رواندا من الدم.. وزي ما قامت سنغافورة ممن لا شيء!
ولو رفضنا نبلعها.. ح نفضل نتعثر.. ونقول: ليه الدول تنهض ونحن نتعثر؟!
الإجابة قدامنا.. في كلام رجل وزنو بميزان الدهب!!
جيش واحد.. شعب واحد.. وطريقة تفكير واحدة.. تبني وطن!!
