(خمة نفس) ــ عبدالوهاب السنجك ــ حاج سيد أحمد.. كلامكم كلو خارم بارم وكمان “خرابيط” ساااكت ــ بعانخي برس
بعانخي برس
المشهد:
حاج سيد أحمد:
هوي يا حاج حمد..
أقيف لي هنا دقيقة، أديك ليها “خمة نفس” تنشف ريقك.
إنت قايل نفسك فاهم البلد دي براك؟
والله كلامكم كلو خارم بارم ساي.. لا بودّي ولا بجيب.
تلاقيط سوالف في جبنة ست الشاي، وتحليل سياسي تحت ضل النيمة،
وفي الآخر تقول لي: “أنا عارف البير وغطاها”!
ياخي إنت البير زاتو ما شفتو.
يوم داك في الجامع شابكنا: “الحكومة ح تعمل وح تسوي”،
وهسع قاعد تفتي لينا في سوق الخضار عن التجار الما برحموا ديل.
يا حاج ما أرحم نفسك، وخت الكورة واطة.
كلامك ده تمشي تحكيهو للشفع في الحلة،
لكن أنا حاج سيد أحمد.. شعري ده ما شاب وبقى أبيض من فراغ.
قوم لف بالله،
خلي عندك حبة منطق بدل الكلام الخارم بارم البتقولو ده.
حاج حمد:
أنت الليلة فاير فينا زي فورة الخميرة في العجين.. ما تصبر، نديك من عندنا!
حاج سيد أحمد:
عندك شنو؟ والله ما عندك الحبة.. كلام تقولو بخشمك ده، وبعدين تقول: “أنا ما قلتو”.
حاج حمد:
أسع أنا قلت حاجة؟ بس فلسفتك دي سويها لزول غيري.
وغيري أنا ما تلقى زول يجيب ليكم أخبار وشمارات البلد.
حاج سيد أحمد:
أخبار شنو تاني؟ ما كلها بقت مناكفات واتهامات وقوالات في الموبايلات..
تلقى الواحد اليوم كلو مكبِّس في التلفون يكضب: “الخرطوم دخلوها، وأم درمان طلعوا منها”. “المشتركة دخلت، المشتركة مرقت”.. انتو قايلين مافي قيادة ولا شنو!!
حاج حمد:
طيب الكلام ده لو ما صاح، بيقولوه ليه؟
حاج سيد أحمد:
أنا أقول ليك.. بعد الخرطوم والجزيرة اتحررت من المليشيا المتمردة، طلعت غرف ومنصات إعلامية خارجية وبقت تروّج في الكلام الفارغ، والزيك إنت بيشيلو وبقشّر بيهو.
حاج حمد:
كيف يعني؟
حاج سيد أحمد:
أقول ليك.. الجماعة قاعدين بس، ما عندهم شغلة غير: “الوزراء اختلفوا، والحكومة انبشقت”.
نسوا إنو الجيش والقوات المساندة ليهو شغالين “بل بس.. فتك متك”.
حاج حمد:
يعني الكلام البنسمعو ده كلو خارم بارم؟
حاج سيد أحمد:
خارم بارم سوداني أصلي كمان، ما ديل ناس المنصات والغرف المعادية للسودان.
وإنت عارف المثل؟ الخليجي بقول ليهو _”خرابيط”_.
يعني الكلام البتقال في المنصات ده كلو خارم بارم وخرابيط ساكت، وإنت تسمع ومدور الكلام “معمول بحب”.. ليه كده يا حاج حمد؟
رووق المنقة شوية، وأشرب ليك ليمون بارد،
ما تخلي الناس يضحكوا عليك.
حاج حمد:
حاضر يا حاج.. كلامك زين.
أنا فهمت.. البتقال كلو في الواتساب والنت خارم بارم وكمان خرابيط ساااكت.
مع السلامة يا حاج، ودّعناك الله. أنا ماشي على المسجد، الجماعة بكونوا منتظرني وعندنا ونسة بعد الصلاة..
حاج سيد أحمد:
يازول إنت والمعاك صلوا صلاتكم امشوا على بيوتكم، بطلوا الكلام الفارغ دا.. ما قلت ليكم حديثكم كلو طالع خارم بارم وخرابيط ساااكت.. كفاية لحدي هنا، معاك سلامة. أنا متقدم على بيتي الله يكفينا شر الكلام “الخارم بارم”.
(خمة نفس)
الدور الذي تقوم به وزارة الصحة في ولاية الجزيرة من حيث تثبيت أركان المستشفيات العامة والمتخصصة والمراكز الصحية وتنشيط دور الكوادر الصحية، يعد إنجازًا يُسجل على لوحة شرف برسم واضح تتناقله الأجيال: “أين كنا وأين أصبحنا”.
(خمة نفس)
أين وزارة الثقافة والإعلام بولاية الجزيرة؟.. أرى الصمت ملازمًا لها.. الحاصل شنو يا جماعة!!
(خمة نفس)
شعب واحد.. جيش واحد.
