(خمة نفس) ــ عبدالوهاب السنجك ــ حاج سيداحمد.. انتو وزير الثقافة والإعلام الحكومي دا دحين ما سمع بولاية الجزيرة ــ بعانخي برس

…حاج سيداحمد زول نصيحه وكلاموا دغري زي السكة الحديد سواق قطر عدييل. (طبعا فيها لفة وسندة ومحطة)
بس المرة دي حلف إلا يكلم وزير الثقافة والإعلام الاتحادي أ. خالد الأعيسر..

..انت ياخالد ما بتعرف ولاية الجزيرة وأظنوا عمرك كلو ما شفتها ولا في خريطة السودان ولا كتاب خرائط الجغرافيا.. مقرر سنة رابعة في الأولية.
نقول انت ما شفتها!!!
طيب ما سمعت بيها؟!

أنت تعرف هي ولاية ثقافية اعلامية رياضية..
.. الأعيسر عامل منها أضان الحامل طرشة؛ ولا كأنها في خارطة الوزارة أصلاً.

.. دي الجزيرة يا خالد.. الولاية البتأكل البلد قمح وتزرع قطن، وبتأكل الوجدان غُنا وشعر وكورة. من مدني البتقول للفجر قوم بدري، لحدي الحصاحيصا البتولد الإذاعيين، ومن الكاملين البتزرع المسرح، لحدي المناقل البتطلع الفنانين.

.. الجزيرة دي يا وزيرنا مصنع الذاكرة السودانية. فيها اتحاد الأدباء والمبدعين أ. عمر السنوسي والمسرحي الجبور والملحن صلاح جميل ، ومنها لاعبية الهلال المريخ، فيها سيد الإتيام والرومان.. المشعل اربجي، ديل بيشربوا الموية قبل التمرين. فيها المسرح ونادي الجزيرة وشارع النيل، وفيها التلفزيون كان بلقى القصة والدراما جاهزة.. وين الناس اسع؟!! خلوهو صقيعة…

.. أها تقول لي ما سمعت بيها؟!

.. ياخ الجزيرة دي لو عطست الخرطوم بتقول للجزيرة “يرحمكم الله” . انت دحين ما سامع العطسة دي، ولا قايلها كحة ساي؟!

.. الجزيرة ما دايرة منك منحة ولا هبة.. دايرة منك تعترف إنها قاعدة ماطشت ولا جنت!! ، وما ملحق في نشرة تسعة. دايرة نصيبها من المايك، ومن الشاشة، ومن الدعم البمشي كلو اتجاه واحد… ما تقولي انت تقصد شنو يازول؟؟!!

يااا الأعيسر.. السكة الحديد دي لو فيها لفة، انت لفيت منها عديل ووقفت في محطة النسيان. رجع القطر لي الورا، وأقيف في محطة مدني.. بتسمع صوت البلد كلو من هنا..

.. انت يالاعيسر ما حا نقدم ليك دعوة رسمية، تعال ساي تلقانا نحنا يانا نحنا..
تعال شوف تلفزيون وإذاعة ودمدني الناقصن شنو..
تعال اسمع من الصحفيين مراسلي الصحف… عمران الجميعابي، وشاكر مختار، ويسن الباقر، نجلاء عمر والشافعي طاشين، وحسن عبدالرحمن.

.. تعال اقيف على حال المسرح الثاني في السودان والخشبة المكسورة
والمسرحيين والمبدعين..
تعال اقعد مع فناني الغناء الشعبي ورقصات الفنون الشعبية..الكمبلا
تعال شوف وزارة الثقافة والإعلام..فيها شنو!! ومافيها شنو!! تعال.. وتعال..

مالك ياخالد ولاية الجزيرة مافي الخريطة ولا ما عاجباك؟؟!
انت تعرف انوا الخرطوم ما كل السودان… امرق تعال ماتبتعد… أغلب الوزراء زارونا حتى رئيس مجلس الوزراء د. كامل ادريس ركب الدقاقة في القسم الشمالي وشارك في حصاد القمح.
انت قاعد في الخرطوم تسوي شنو..؟؟ ما عندك نثرية ولا ماعندك جازولين للعربية؟ ولا الحكاية خايف من تراب المشروع ولا مطبات المسعودية والمسيد؟
.. انت خايف من الجماعة ياهم وكلمة خارج نفسك.. عربيتك دستورية ما حا يقفوك عشان” تخارج نفسك”
ولا مش كدااا

… والله يا الأعيسر حكايتك حكاية، حكايتنا معاك حتكون حكاية..
.. تعال ساي، بنضبح؟ ليك العجل وبنفرش ليك البرش. ما بنكلفك حق التذكرة ولا بنسألك من بدل سفر. تعال بي رجليك كان العربية عطلانة، أهل الجزيرة بيلاقوك في الظلط بالترحاب والهتاف ودق الطار والطنبور والكيتة.

.. انت ياخالد أظنك ما عارف والي الجزيرة اسمو الطاهر إبراهيم الخير.. ولا عارف اسم مدير عام الثقافة منو ولا مدير الإذاعة أصلا كان في تلفزيون.. ولا عارف طاقم الإذاعة المدورين الشغل كم..

… أنا حاج سيداحمد أقوليك تصدق الإذاعة مدورة شغالة بعدد لا يتجاوز العشرة.. عشرة بس يا مؤمن!! عشرة انفار شايلين ولاية كاملة فوق ضهرهم. المذيع هو المنتج هو المهندس هو الغفير، والمكنة واحدة لو كحت الإرسال كلو برقد مستشفى ودمدني..

والتلفزيون؟ آآخ يا التلفزيون. بقى زي الديوان المهجور، ترابو كوم والاستديو بقى مخزن للكراكيب. الشاشة نشفت من عدم الوشوش، والكاميرا صدت من قلة الضحكة… العجوز لو مسحوها كريمات هي عجوز..
…حكومة الجزيرة تدفع وتشتري وتجيب والحال في حالوا..

.. كمان أقوليك لمن تجينا زيارة اسأل.. اسأل بس ما تتحرج. اسأل: انتوا دحين عملتوا توثيق عن ولاية الجزيرة بعد طرد ودحر المليشيات المتمردة، والحاصل اسع من نهضة واستقرار “لكي لا ننسى”؟
ولا منتظر التوثيق يجيكم ديلفري لحدي الوزارة؟!

.. الجزيرة قامت من الرماد براها. المزارع رجع حواشتو، والمعلم رجع طبشيرتو، والفنان رجع عودو. وانت لسه بتفتش في الأرشيف القديم. تعال وثّق النهضة دي بي عينك، عشان بكرة ما تقول “ما كلمونا”

خف رجلك ساااكت يا الأعيسر
واحسن تشوف ما تسمع.. لأنو السمع قالوا بجيب الكضب، لكن الشوف بجيب الجلد والصوف..

يا خالد، الكرسي ما بدوم والمنصب زايل. الببقى هو الاسم والسيرة. ودايرنك بكرة لما يسألوك: عملت شنو للجزيرة؟ تقول مشيت وشفت وسويت، ما تقول والله ما جاتني دعوة رسمية من الحكومة..
…ياخالد الاعيسر حكومة الجزيرة خليها (في همها…تلملم في أطرافا.. ما الحرب خربتا خراب لكن أهلها زايدين رجالة شغالين هي لله.. هي لله.

.. أنا حاج سيداحمد بقول ليك كلامي عدييل احسن تزورنا عشان تعرف نحنا وين وانتوا وين..!!
ولو ما جيت، بنجيك نحنا. وبنجيك بالحجة والدفتر والقلم، والحساب ولد، وبنجيك بالطنبور والدلوكة والربابة.
والبلاقي الهبوب بلويها… اهاااا قولك لينا شنو !! تجي ولا نجي..!!!

(خمة نفس)
.. إيران تمرر الكرة لعبة بينية.. أمريكا تتراجع لصد الهجوم.. مضيق هورمز يفتح لمرور السفن.. التجارية..
أسعار البترول تتراجع …
.. اما نحن واقفين في نفس المكان.. الطلع مابنزل عندنا.. فوق بس..
ودقي يامزيقا.. دقي..