*عمر سيكا يكتب .. هل سيصبح المواطن السوداني نباتياً تماماً؟!* *بعد تحرير الخرطوم والعودة الطوعية.. الغلاء الفاحش يخنق المواطن* ــ بعانخي برس
بعانخي برس
رجعنا.. رجعنا لبيوتنا بعد تحرير الخرطوم، رجعنا بالعودة الطوعية، شايلين فرحتنا وشايلين أحلامنا، قلنا خلاص الحرب انتهت، والحياة حترجع زي زمان.
لكن أول ما وصلنا السوق، لقينا حرب تانية، حرب أخطر من حرب الرصاص.. حرب *الغلاء الفاحش*.
سؤال بسيط بسألو كل مواطن سوداني اليوم: *هل نستغني عن تناول اللحوم والخبز؟ هل حنبقى نباتيين غصباً عننا؟*
تعالوا نشوف الأرقام، والأرقام ما بتكذب:
*كيلو اللحمة بقى بـ 54 ألف جنيه!*
*كيلو السكر بـ 10 ألف جنيه!*
*معجون سيجنال المصري بـ 14 ألف جنيه!*
*كيلو الطماطم بـ 20 ألف جنيه!*
*4 عيشات بـ 2 ألف جنيه!*
واللبن الحليب والبدرة حدث ولا حرج، والمواد البترولية نار مولعة، وكل يوم سعر جديد.
أما المواصلات، فدي حكاية براها، على حسب جشع سائقي المركبات، محطة لمحطة التسعيرة بتختلف، لا رقيب ولا حسيب، المواطن المسكين بيدفع وهو ساكت.
يا جماعة، المواطن السوداني رجع بيتو، لكن لقى بيتو فاضي، لا عفش، لا شغل، لا قروش. رجع عشان يبدأ من الصفر، لكن لقى السوق ضدو، ولقى التجار ضدو، ولقى الجشع ضدو.
الموظف راتبو ما بيكفي أسبوع، والعامل اليومي شغلو ما بيغطي حق العيش، والأرملة واليتيم يعملو شنو؟
هل المطلوب من المواطن السوداني إنو يبقى نباتي تماماً؟ ينسى اللحمة واللبن والسكر؟ حتى العيش بقى غالي، وحتى الطماطم، الطماطم البنزرعها في أرضنا، بقت بـ 20 ألف!
نحن ما ضد الربح، وما ضد التجارة، لكن ضد الجشع والاحتكار واستغلال ظروف الناس.
*رسالتي على الملأ:*
إلى الجهات المسؤولة، إلى ولاية الخرطوم، إلى المحليات، إلى حماية المستهلك:
أنقذوا المواطن قبل ما يموت جوعاً وقهراً. فعلوا الرقابة، حددوا الأسعار، افتحوا الأسواق المخفضة، ادعموا التكايا، وادعموا العودة الطوعية بي أفعال ما بي كلام.
وإلى التجار وأصحاب المركبات:
اتقوا الله في هذا الشعب، الشعب ده ضحى وصبر وقدم الشهداء، ما تستغلوا صبرو.
المواطن السوداني ما داير يبقى نباتي، المواطن داير يعيش بكرامة، داير يأكل أولادو لحمة وعيش ولبن، زي باقي خلق الله.
اللهم فرج على أهل السودان، اللهم أرخص الأسعار، وبارك في الأرزاق.
