(خمة نفس) ــ عبدالوهاب السنجك ــ حاج سيداحمد انتوا البلد زمان كانت ماشة كيف!! واسع بقي فيها لواءات من دون كفاءات!! ــ بعانخي برس

حاج سيداحمد لم يكن من عامة الناس فهو يعرف طريق العمل العام والخاص، وخلط وعجن السياسة، يقرأ الواقع والمستقبل، يقول كلامو عدييل كان قاعد مع السياسيين ولا مع عامة الناس، دائما ماتجده مهموما بقضايا الوطن.

مجلسه لا يخلو من النقاش والطرح السياسي الذي يتطلب مهارة ومعرفة مواقع الخلل، وكيف يتم وضع الحلول لكل قضية حتى لا تتشعب (تبقى كبيرة) من الصعب إيجاد مخرجا لها..فهو لا يقف بعيدا عن زنزانات السجن (كراع برا، وكراع جوه) والسؤال والجواب من المتحري.

المرة دي “جابا” كبيرة وهو يتحدث مع صديقه حاج حمد “ابوالعريف”..

@..انت ياحاج حمد البلد دي كانت زمان ماشة كيف!!

# ياتوا زمن تقصد ياحاج سيداحمد..زمن الإنجليز، ولا زمن حكومة الأحزاب، ولا زمن العساكر، ولا حكومة الإنقاذ. كدي حدد لي بس..

@.. ديلك خلهن زمن حكومة البشير وحزبو المؤتمر الوطني.

# حكومة البشير ياحاج سيداحمد وحزب المؤتمر الوطني كانوا مالين يدهم وعارفين بعملوا في شنو وبالذات السنوات العشرين الأولى لكن وبعداك فكوها وبقت “عايرااا وادوها سوط” لمن وقع الفأس في الرأس.. ودقينا الدلجة.

@..يعني كدا خلاص اسع وقعنا وسفينا التراب ياحاج حمد ولا تقصد شنو.

# انا ما افتكر كداا بس، عايزة شوية صبر يعني الحرب الملعونة دي تقيف يعلنوا الانتخابات ويجيك الصف التاني بالصندوق عديييل.

@ صف شنو كمان يا ابوالعريف ما في أحزاب تاني يعني.

# انت ياحاج سيداحمد زول سياسة وعارف البئر وغطاها وعمرك كلوا تخطط وترسم عايز اسع تقول لي البلد فيها حزب من غير المؤتمر الوطني، اسع دااا الظاهر منو من الاحزاب كان طائفية ولا أحزاب فكة.

@..بكل أمانة ولا حزب ظاهر كلهم كأنوا كبوهم في البحر.. لكن عندي ليك سؤال تاني ياحاج حمد..انت اللابسين الكاكي وراصين العلامات وعاملين فيها لوردات ولواءات من دون كفاءات ديل كيف كمان!!

#.. ديل ياحاج نحن في حالة حرب ضد المليشيا المتمردة والحمدلله منتصرين وبعداك يجي “الدمج والتسريح” كل العلامات المرصوصة على الكتوف عييييك تاني.. كنبة الاحتياطي بس.

@ والله ياحاج حمد بقيت تعرف السياسة وفاهم كويس كمان..

#.. ما تلميذك ياحاج سيداحمد تقولي” لواءات” انا ذاتي كمان من بكرة لواء ركن كمان رايك شنو!!

@ يازول امشي شوف ليك شغلة وتم مرسالك لي حاجة نفيسة المرسلاك لي حاجات خبيز العيد، وخبر دقيق المؤتمر الوطني وصلنا رايك شنو!!

#.. صحيح في حزب غيرن دق صدروا وقال أنا…أنا.. وظهر في الساحة.

@ ياحاج بطل نضم وامشي شوف شغلتك ما توجع رأسي وانا صايم.

#.. معاك سلامة ياحاج.. الدنيا قبايل عيد.. ودقيقنا في بيتنا.

(خمة نفس)

الايام تمضي والأسر تستعد لاستقبال عيد الفطر المبارك.. فهل سيفي المرتب كل ماهو مطلوب..ام سيسقط من امام الخزينة العامة..

(خمة نفس)

أمريكا تضرب.. إيران تضرب.. إسرائيل تدخل الملاجئ..ودويلة الشر ترجف ، العالم واقف على رجل واحدة…وهو يصرخ ماذا سيحدث ياترى!!!!

نقول لامراء دويلة الشر الإمارات.. تعالوا لينا لاجئين مافي مشكلة تب!!!