#قطع الكهرباء ترشيد ام تعذيب!!!!
مني حمزة
السودان به خمسة خزانات او مايعرف بالسدود المائية على النيل الازرق و نهر النيل و نهر عطبرة..
وهي كالاتي،،،
خزان سنار..خزان الرصيرص..خزان خشم القربة..خزان جبل اوليا…خزان مروي ..كجبار
الخزانات دي او ماتعرف بالسدود مهمتها حفظ المياه لري المشاريع الزاعية…وكذلك لتلويد الطاقة الكهربائية المائية…..
بالتالي الكهرباء الممكن تنتج من هذه السدود
المائية…بتغطي حوجتنا في السودان..
ويفضل فائض كمان…اذا فعلا تم الاستفادة
منها في توليد الكهرباء!!!
طيب قول مافي امكانات…او التكلفة عالية لاستخراج الكهرباء منها كلها…
ربما تستخرج الكهرباء من بعضها مثل سنار
ومروي والرصيرص،،،
مامشكلة،،،،،
هل هناك فشل في انتاج الكهرباء من هذه
السدود المزكورة؟؟؟
عشان كده من قبل عدة سنوات دخلنا في السودان…فيما يعرف بقطوعات الكهرباء المبرمجة للترشيد!!!
وزادت القطوعات في الشهور الاخيرة ليصبح
عدد ساعات برمجة القطع عشرة ساعات من
اصل 24 ساعة في اليوم..
حتى شهر رمضان الفضيل لم يعتق من هذه
البرمجة للقطوعات!!!
وحتى لحظة كتابة هذا المقال قاطعة تحديدا
في مدني…
وزاد الامر سوء للمرضى..واصحاب الاعمال المرتبطة بالكهرباء…الا من استطاع منهم شراء
مولد…وحديثا شراء طاقة شمسية واظن ان
الاستفادة من الطاقة الشمسية هي فكرة عبقرية وجيدة في بلدنا البنحب(شمسها الحراقة)…
لكن هل ممكن الدولة تستبدل الكهرباء المائية
عالية التكاليف…
وتطور وتوفر استخدام الطاقة الشمسية لحل
مشكلة الكهرباء للمواطن البسيط المابقدر يشتري …مولد.. او طاقة شمسية؟؟
ام حتستمر القطوعات في هذا البلد المنكوب
بسبب الترشيد؟؟؟
لكن سؤال من زول بسيط قيام الحرب العبثية
في الخرطوم ما رشد لينا حبة كهرباء… نديها
للغبش في الولايات؟؟
خاصة انه بعد الحرب العبثية اتدمرت البنية
التحتية في الخرطوم…يعني مصانع …وشركات..ومؤسسات حكومية
وعقارات حكومية…وبيوت دبلماسية…وسفارات …وبيوت وزراء…وبيوت
الغلابه في الاحياء الهجروها وطقشوا الولايات
وبقت في معظم الخرطوم مافي حياة،،،
ومافي حوجة لكهرباء….
مش مفروض تتوفر حوجة الولايات من الكهرباء ولا شنو؟؟؟
حاجة تانية لما قامت الحرب وإتدمرت البنية التحتية في الخرطوم…وتاثرت شبكة الاتصالات بذلك …ناس الكهرباء فشلوا في بيع
الكهرباء للمواطن عشان الحواسيب طشت..
قاموا بمبادرة جميلة طالبوا الناس تجر الكهرباء بواسطة فنين كهرباء لحين اشعار اخر
والناس حفظت الجميل للشركة القومية للكهرباء وانها حست بوجع الناس وبهم الحرب
الوقع على الناس…وبعدم دفع مرتبات العاملين
بالدولة،،،
وعشان ما انسى برضوا السبب ده خلى ناس
الاتصالات يفتحوا للمواطنين شبكاتهم النيتية
بلوشي وده مقال تاني###
لكن ناس شركة الكهرباء بدون مقدمات طافوا بالميكرفونات الشوارع يحزروا وينزروا في الناس تبلغ عن الجبادة والا الغرامة طايلاهم
ونسوا انه الناس ديل ماعندهم مصدر دخل عشان يشتروا كهرباء..
واصلا بعد الشراء هي مامتوفرة للمواطن
العيان..والعنده ادوية لازم تتحفظ في التلاجة
والعنده باقي اكل عايز يمشي به حاله باكر
كل ديل الترشيد …وصلهم مرحلة تعذيب
والى متى؟؟؟
