مني حمزة
الجانب الايجابي للحرب 3
ظهور تجار الازمات،،،
كما اطلق عليهم البعض هذا الاسم..
هم منو؟؟؟
هم بعض اصحاب المركبات الرحلوا الناس
من ارض المعارك الى الولايات الامنة…
بأسعار تذاكر تفوق حد الوصف والخيال
وعشان الناس مجبورة قبلت بالاسعار دي
والمابقدر قاعد حتى اليوم تحت اصوات الرصاص ورحمة ربنا…والاصطفاه ربنا بالشهادة وجنة الخلد…لقى حتفه..
لكن الجانب الايجابي….انه في متطوعيين
كانوا برحلوا الناس بعرباتهم بدون مقابل وبرفعوا في الميديا مكان تحركهم من وين…
وفي منظمات طوعية ظهرت في ام المدائن مدني من شباب المقاومة كانت عندها رحلات يومية من مدني لكل ولايات السودان بدون
اجر…
ياخ اصحاب الرقشات في مدني في بعضهم تاجر بالازمة…ورفع سقف المشوار
وفي البعض الواقف في مداخل المدينة وبنقل في الناس بدون اجر..وفي الرافعين ارقام تلفوناتهم للناس الجابتهم الحرب عشان ينقلوهم في اي وقت للمستشفيات واقسام
الطواري..دي ايجابية ولا لا!!!
نجي لناس العقارات السكنية…او اصحاب
الشقق والبيوت..الاتكلمت عنهم الميديا انهم
رفعوا سقف اجاراتهم واستغلوا ناس الخرطوم
وماراعوا الظرف الهم جو في..
والايجابية انه في ناس في كل قرى السودان
عامة والجزيرة خاصة …استقبلوا ناس الخرطوم في الطرقات بالاكل والشراب..ونزلوهم على البيوت والدواويين
في قراهم ومازالوا موجودين طيلة الاشهر
السابقة…ولسع مستضافين مكرميين معززين
لانهم سودانيين…وياهو ده السودان
حتى داخل مدني في كتير من البيوت اصحابها فتحوها لناس الخرطوم بدون اجر
او مقابل..
في مغتربين فتحوا بيوتهم في مدني..ورفاعة
وكل مدن ولايات السودان للناس الجابتهم
الحرب بدون اجر…ايجابية ولا ما ايجابية؟؟؟
في تجار رفعوا اسعار المواد التموينية عشان
يستغلوا الوضع..وبين يوم وليلة السوق امتلئ
بالمنتجات المستوردة من دول الجوار…واصبح
العرض اكبر بكتير من الطلب خاصة مع عدم
وجود سيولة…ونزلت اسعار السلع الاستهلاكية
بسبب الحرب واصبحت في متناول يد الجميع..حتى موظفي الدولة الماصرفوا مرتبات منذ سته شهور…
والحياة مشت بالرغم من انه في حرب عبثية
لكن في قيّم انسانية اتفرد بها هذا الشعب من
دون شعوب العالم..
واكبر قيّمة انسانية تميزنا بها هي العِزة،،،،،،
نحن بحمد الله الحرب ماحوجتنا لمعسكرات لاجئين في دول الجوار!!!
شلنا بعض بتكاتفنا…وتكافلنا الاجتماعي ومازلنا بفضل الله..
ودي الايجابية …
الحرب اظهرت قدر كيف اننا اخوان اخوان
واصحاب نخوة..ومروة
والفينا مشهوده
