الجانب الايجابي للحرب
2
مني حمزة
اسفيرياً،،،،،
اتحدثت الناس في الميديا عن نزوح ناس الخرطوم…والكلمة دي مقبولة ومعروفة تاريخياً انه الانسان البطلع من منطقته بسبب
المحل….او المجاعات…او الجفاف…او الزحف
الصحراوي…. او الحرب…او من مناطق الزراعة لمناطق الصناعة…او من الارياف للمدن.. (بنقول عليه نازح)!!!!
ودي مافيها غضاضة ولا نبذ
لكن لم نقول للمواطنين السودانيين الجابتهم
ظروف الحرب…(لاجئين)مامقبولة لانهم جو للبيت الكبير…للاسرة الممتدة…للاصل والجذور
للولايات الام…
ومعروف اللاجئ ده بكون …خرج من حدود وطنه لدول الجوار بسبب الكوارث….
طيب لي كل الميديا…بتقول لاجئين
باختصار لانه ده حرب اعلامية مقصود بيها
اشعال روح القبلية …والصراع العرقي العنصري…
ولكن الجانب الايجابي……
من الحملة دي ظهر عيان بيان لم اتكاتفت كل
منظمات المجتمع المدني الخيرية…وشباب المقاومة…والثورة المتطوعيين…لاسكان وخدمة. هؤلا ء المواطنيين الذين اجبرتهم الحرب للخروج من الخرطوم…ومازالوا يقدمون الخدمات…دون مقابل بدون عون
معتمدين على التكافل الاجتماعي والخيريين في المجتمع…والمغتربين…بل حتى ان بعض
الكفاءات العلمية الجات من الخرطوم..شاركت
في خدمة مراكز الايواء…بالتعليم ليلتلاميذ
الذين جلسوا لامتحان الشهادة الابتدائية
وساهموا في المراجعات والاعداد الذهني لهؤلاء
لدرجة انهم دخلوا في قائمة الشرف..
وكذلك الاطباء مازالوا يقدمون الخدمات العلاجية عبر العيادات المتحركة للنازحين…
دون مقابل…ولاننسى الاطباء النفسيين ومتخصصي التأهيل النفسي الذين يقدمون العون والدعم النفسي لهؤلاء الذين …تضرروا
نفسيا بسبب الحرب…
وايضاُ لا ننسى الدراميين الذين يقدمون العون النفسي والترفيهي لمراكز الايواء..
منذ بداية الحرب ومازالو..
اها ده جانب ايجابي ولا رايكم شنو؟؟
والاجمل الاجمل،،،
انه الدراميين والمبدعيين الجابتهم الحرب
قايمين بنفرة لنظافة وتجميل ام المدائن مدني
ودي قمة الايجابية الحظيت بها مدني ..بل واكيد مدن كثيرة في السودان …بعد ما رجعوا ليها اولادها بسبب الحرب من الخرطوم
