(خمة نفس) ــ عبدالوهاب السنجك ــ ماذا لو وضعت حكومة بروف كامل كل إمكانياتها لإنجاح مشروع الجزيرة..؟! ــ بعانخي برس

سؤال بسيط.. لكن إجابتو بتخوف!!

ماذا لو..؟!

ماذا لو حكومة بروف كامل إدريس، حكومة الأمل دي، قررت يوم واحد بس، إنو مشروع الجزيرة ده ما ملف جانبي في وزارة الزراعة.. بل هو السودان كلو..؟!

ماذا لو قررت إنو كل وزاراتها تشتغل للمشروع..؟!
المالية للتمويل..
الطاقة للجاز والكهرباء..
الري للترع والقنوات..
الخارجية للتسويق والصادر..
والداخلية لحماية المشروع من أي تجاوز وفق القانون.

أول حاجة ح تحصل شنو؟!

ح يحصل إنو المزارع ح يرجع مزارع.. ما شحاد!!
اليوم المزارع في الجزيرة بيمشي البنك يشحد التمويل.. بيمشي السوق يشحد التقاوي.. بيمشي الطلمبة يفتش الجازولين.
لو الحكومة وضعت كل إمكانياتها.. المزارع ح يقعد في حواشتو.. والتمويل يجيهو لحدي عندو.. والتقاوي المحسنة تجيهو.. والسماد يجيهو بسعر الدولة.. ما بسعر السوق الأسود!!

تاني حاجة: الزراعة التقليدية ح تموت..
نحن لسه بنزرع زي ما كان بيزرع جدودنا قبل 100 سنة..
التيراب نفس التيراب نزرعو كم موسم لمن يقول الروب..

لو الحكومة جادة.. ح تدخل التقانة الزراعية والبذور المحسنة..
ري بالتنقيط.. طاقة شمسية.. طائرات درون للرش.. حصادات حديثة.. بحوث حقيقية من جامعة الجزيرة ما بحوث في الأدراج..
المزارع بدل يزرع قمح ويخسرو.. يزرع قمح ويصدرو!!
بدل يزرع قطن ويبيعو خام.. يزرع قطن ويصنعو!!

تالت حاجة: مدني ح ترجع عاصمة السودان الاقتصادية..
371 كيلو طرق زراعية.. دي ما طرق ساي.. دي شرايين..
لو اتعملت صح.. واتربطت بالصادر.. المحالج ح تشتغل.. المطاحن ح تشتغل.. المصانع ح تشتغل.. الشباب الحايم في السوق من غير شغلة ح يلقى شغلة في الغيط وفي المصنع وفي الترحيل..
الجزيرة لو قامت.. السودان كلو بيقوم!!

لكن.. السؤال الصعب:
هل الحكومة ح تقدر؟!
ولا ح تقول: والله المشروع داير قروش كتيرة.. ونحن ما عندنا..؟!

القروش ما مشكلة..
المشكلة الإرادة!!
وإدارة المشروع عندها الأفكار والقوة والعزيمة، لأنو المهندسين والعاملين جاهزين للشغل،
والسودان ده لو باع موية النيل ساي.. بيمول المشروع!!

لكن المشكلة إننا بنصرف القروش في المؤتمرات واللجان والوفود.. الموسم الشتوي يجب أن يحقق الإنتاجية المطلوبة، ونكون جاهزين للموسم الصيفي القادم، تحضير جيد.. تطهير قنوات الري من الطمي والحشائش، تقاوي محسنة، مواقيت للزراعة وتوزيع المحاصيل وفق السوق العالمي والمحلي، كدا بنطلع لبر الأمان. ما عايزين 2.2 مليون فدان تموت بين أيدينا، وخبرات المحافظ التي امتدت لأكثر من 40 عاماً لازم نستفيد منها اليوم قبل بكرة..

خمة نفس أخيرة:
ماذا لو..؟!
لو حكومة الأمل وضعت كل إمكانياتها لمشروع الجزيرة.. والله العظيم بعد 3 مواسم بس.. السودان ما ح يحتاج يطلب قمح من بره..
بل ح يبيع قمح.. وح يبيع قطن.. وح يبيع خضار..
ويعمل مصانع تحويلية للصادر “صُنع في السودان”
المشروع ده ما داير معجزة..
داير قرار واحد..
قرار إنو الجزيرة أولاً.. والباقي بعدين..

جيش واحد.. شعب واحد.. ومشروع واحد يرجع يأكلنا كلنا!!