*الفورة .. مليون* ــ *الشافعي طاشين* ــ *إلى والي الجزيرة .. أعقلها وتوكل .. وكشهم اليوم قبل بكره!* ــ بعانخي برس

يا والي ولاية الجزيرة ..
سلام عليك ..
كلامنا فيك قلناه أكثر من مرة، ونقوله اليوم للتاريخ: أنت رجل مخلص وصادق، وعادل زول شغل، بتحب الناس المساكين وعاوز تسعدهم. نيتك سليمة ويدك نظيفة، وهذه شهادة لا نجاملك فيها .
لكن براك ما بتقدر .. والله ما بتقدر .. الشيلة تقيلة، وولاية الجزيرة بعد الحرب ما بتمشي بزول واحد، عاوزة حكومة تشيل معاك الشيلة، وبطانة خير تعينك على القوي الأمين .
أخبار متداولة بقوة أنك تتشاور لتغيير حكومتك، ونحن بنقول ليك من منبر (الفورة .. مليون): ربنا يوفقك ويسدد خطاك .. أعقلها وتوكل .. لكن أسألك بالله ما تطول الشورة .
كش الفاشلين .. كش الكذابين .. كش الكسلانين .. كش المتقاعسين من وشنا اليوم قبل بكره .
بنقولها ليك صراحة وبمهنية: حكومتك فيها 2 أو 3 فقط .. والله جادين ومهنيين، أنجزوا وعملوا من الفسيخ شربات، لحد ما الولاية مرقت لبر الأمان وبدأت تنبت وتخضر وتزدهر بعد الخراب .
لكن الغالبية الفاشلة طمست كل الجهود .. طمست كل الإنجازات التي حققتها تلك القلة المجتهدة . الفشل معدي، والكسل يغطي على النجاح .
نحن عاوزين نحافظ عليك أنت والقلة الناجحين .. ونبعد كل متقاعس عديم الإحساس بما يدور داخل وزارته، خليك من الشارع والمواطن البسيط .
هل تصدق يا سعادة الوالي عندك مدير عام عامل نفسه وزير، ومنذ أن عينته لم يجتمع إلا مرة وااااااحدة رسمياً مع إداراته؟ مرة واحدة؟ كيف تُدار وزارة؟ كيف تُحل مشكلة مواطن؟
ده نموذج واحد بس .. ووجع القلب كتييييير .. ملفات مقفولة .. مكاتب مكندشة .. ومواطن يئن .
يا والي الجزيرة .. الجزيرة أمانة في رقبتك .. وتاريخك النظيف أمانة .. لا تترك الفاشلين يهزمون مشروعك .. ولا تترك المتقاعسين يخصمون من رصيدك عند أهلك .
القرار بيدك .. والتوقيت الآن .. كشهم اليوم قبل بكره .. والشعب كله معاك .

# الفورة .. مليون
# تحرق الفاشل.. لحماية
الوالي الناجح
# اعقلها وتوكل .. اليوم قبل بكره