(خمة نفس – عاجل) ــ عبدالوهاب السنجك ــ بلاغ ضد وزارة.. و10 محامين تحت إشارة السنوسي.. ودقي يا مزيكا!! ــ بعانخي برس

الخبر الجانا حسب مصادرنا الخاصة بيقول:

هنالك اتجاه لتدوين بلاغ ضد من منع المدرب الدولي أ. عمر السنوسي من تدريب معلمين بولاية الجزيرة.. وهنالك أكثر من 10 محامين تحت إشارة الأستاذ السنوسي.. جاهزين!!

ودقي يا مزيكا..!!

تعالوا نفت البلاغ ده حتة حتة..

الحتة الأولى: البلاغ.. بلاغ شنو؟

الجماعة قالوا حيدونوا بلاغ..
بلاغ إساءة؟!
بلاغ تعسف في استخدام السلطة؟!
بلاغ إهدار فرصة تدريب ممول دولياً؟!
بلاغ تشويه سمعة محاضر دولي؟!

القانونيين أدرى..

لكن رسالة البلاغ واضحة: .. كرسي الوزارة ما بيحمي من القانون..
انتم منعتوا محاضر دولي بدون مسوغ قانوني.. والمجلس الثقافي البريطاني عندو عقد مع الوزارة الاتحادية.. وانتم ولاية.. ما من حقكم تمنعوا تنفيذ عقد اتحادي دولي بدون قرار مكتوب ومسبب!!

البلاغ ده لو اتدون.. حيبقى سابقة!!
أول مرة في تاريخ الجزيرة يتفتح فيها بلاغ بسبب منع مدرب من تدريب معلمين!!
يسجل في التاريخ!!

الحتة التانية: 10 محامين تحت الإشارة..

ودي الخمة الكبيرة!!

أكثر من 10 محامين تحت إشارة أ. عمر السنوسي!!

يعني شنو تحت الإشارة؟!
يعني التلفون يرن.. المحامي يجي لابس الروب!!

ليه 10 محامين يتطوعوا مجاناً للدفاع عن محاضر؟!

لأن القضية ما قضية عمر السنوسي براهو..
القضية بقت قضية رأي عام..

المحامي الأول قال: ده دفاع عن حرية التعليم..
المحامي التاني قال: ده دفاع عن كرامة المعلم..
المحامي التالت قال: ده دفاع عن سمعة الجزيرة قدام المنظمات الدولية..
المحامي الرابع قال: ده دفاع عن المعلمين الاتشطبوا من القائمة!!

10 محامين من الجزيرة والخرطوم.. كل واحد عندو مكتب.. وكل واحد عندو قضايا بمئات الملايين.. يخلو شغلهم ويجوا يدافعوا عن أستاذ إنجليزي؟!
هو ذاك المعلم الذي تدرج حتى نال درجة المدرب الدولي بشهادة أهل اللغة الإنجليزية

ده معناهو شنو؟!
معناهو الوزارة خسرت الشارع القانوني كمان!!
معناهو التضامن ما بقى معلمين بس.. بقى محامين.. وبكرة حيبقى أطباء ومهندسين من الداخل والخارج!!

الحتة التالتة: ودقي يا مزيكا..

أيوا.. دقي يا مزيكا..

لأن المزيكا بدت..

مزيكا البلاغات.. ومزيكا البيانات.. ومزيكا المنشورات..

زمان كان الوزارة هي البدق المزيكا.. تمنع.. تشطب.. تعدل القوائم..
هسه المزيكا بقت تدق جواا الوزارة!!

ودقي يا مزيكا على إيقاع:
– تقرير المجلس الثقافي البريطاني الحيمشي لندن..
– تقرير وزارة التربية الاتحادية الحيمشي بورتسودان..
– بلاغ النيابة الحيمشي المحكمة..
– والمذكرة الحتمشي الوالي..

مزيكا واحدة.. لكن ب 4 آلات موسيقية ونوتة واحدة!!

خمة نفس أخيرة.. نصيحة قبل ما المزيكا تدق والاجساد تهتز وتتمايل والرقيص يبدأ..

يا وزارة التربية والتعليم بالجزيرة

قبل ما البلاغ يدون.. وقبل ما الـ 10 محامين يلبسوا الروب.. وقبل ما المزيكا تبقى سيرك.. وسيرة وغنوة.

عندكم حل واحد بسيط.. يحفظ ماء وجهكم ووجه الوزارة:

أصدروا بيان اعتذار.. قولوا: حصل سوء فهم..
أعيدوا الأستاذ عمر السنوسي للقاعة معزز مكرم..
ألغوا القائمة المعدلة أم 30.. ورجع القائمة الأصلية أم 50 معلم ثانوي موزعة على كل المحليات..
خلي التدريب يتم.. وصور من داخل القاعة وقولوا: الجزيرة ترحب بالتعاون الدولي..

كده انتم كسبتم.. والمعلم كسب.. والجزيرة كسبت..

أما لو تكابرتم.. وقلتم: نحن الوزارة.. وما بتتراجع.

فحينها.. دقي يا مزيكا.. والمزيكا حتبقى حارة.. وحارة شديد.. وما بتقدروا تبشروا تاني!!

القانون ما فيهو وزارة.. القانون فيهو حق..

وعمر السنوسي صاحب حق.. ومعاهو 10 محامين.. ومعاهو المعلمين وتلاميذو ومعاهو شعب الجزيرة كلو… رايكم شنو!!

جيش واحد.. شعب واحد.. ومحامي واحد وراهو شعب.. أقوى من وزير وراهو تلاميذ!!