*الفورة مليون* ــ *الشافعى طاشين* ــ *شكراً والي الجزيرة .. رجعت لينا “كفر ووتر”* ــ بعانخي برس

والله العظيم حركة تفرح .. وتشرف .. وتبكي من الفرح .
في زمن بقى الوفاء فيهو عملة نادرة .. يجي *والي الجزيرة الأستاذ الطاهر إبراهيم الخير* ومدير عام وزارة الشباب والرياضة الأستاذ طارق عبد الرحمن .. يدقوا البيبان .. باب .. باب ..
في دردق .. وفي 114.. وفي العشير .. وفي مارنجان .. وفي أشلاق البوليس .
يزوروا *حاكم وداعة .. وحسين كوشينا .. ومهدي عابدين .. وعصام غانا .. والفاضل قابل .*
قامات .. شالت إسم مدني في كتافها سنين .. لما كان شعارنا الخالد يهز السودان:
*”مدني .. كفر ووتر”*
سيد الأتيام الأهلي .. والرومان الإتحاد .. والنهضة دردق .. والشعلة الدباغة .. والنيل المؤسسة التربوية .
تاريخ ما بتنسي .
*شنو معنى ودلالات الزيارات دي في الوقت ده؟*
*المعنى الأول: الوفاء لأهل العطاء*
دي ما زيارة والي للاعب كورة ساي .
دي دولة بتقول: نحن ما بننسى رجالنا . وده إتجاه صحيح في وقت صحيح .
لما الشباب يشوفوا الحكومة بتكرم رمز قديم .. بعرف إنو العطاء ما بضيع .
زي ما قال رئيس نادي النهضة سفيان سعيد: *غياب المناشط بساهم في إنحراف الشباب .* والوالي فهم الرسالة .. بداها بالجذور .. بالناشئين والمدارس السنية .. وبالوفاء للقدوة .
*المعنى الثاني: عبرت عن وجدان أهل الجزيرة*
أهل الجزيرة وجدانيين .. بحبوا الكورة .. بحبوا الفن .. بحبوا الأدب .
الزيارات دي لامست الوتر الحساس .. وتر *”كفر ووتر”* اللي إتقطع سنين بسبب الحرب والإهمال .
عشان كده الناس رحبت .. والأسر فرحت .. والمعنويات إرتفعت .
*شكراً والي الجزيرة .. شكراً وزارة الشباب والرياضة*
شكراً من القلب .. لأنك قاعد تشتغل .. شايل هم إنسان الجزيرة في معاشو .. وفي صحتو .. وفي رياضتو .. وفي وجدانه .
*ويا سعادة الوالي .. أسمح لي بهمسة محب:*
هذا الوفاء الجميل .. أتمنى أن يمتد .. ليلامس الشق الثاني من وجدان الجزيرة .
*وجداننا الفني والأدبي والثقافي ..*
عندنا أسر رموز رحلوا للدار الآخرة .. وتركوا إرث من *”من أرض المحنة” إلى “قلب الجزيرة”*
وعندنا أحياء .. ما أكثرهم .. من المبدعين والشعراء والفنانين .. ينتظرون طرقة باب مثل التي طرقتها في دردق ومارنجان .
ويمتد الوفاء أيضاً .. *للرموز الإدارية والتعليمية والهندسية والمهنية ..*
المعلم الذي خرج أجيالاً .. والمهندس الذي خطط مدني .. والطبيب الذي داوى الفقراء مجاناً .
حتى نملك شباب اليوم تاريخ رموزهم .. الذين رفعوا إسم الجزيرة عالياً في الداخل والخارج .
*يا والي الجزيرة ..*
ما تفعله هو إعادة الألق .. ليس لشعار “كفر ووتر” فقط .. بل لشعار أكبر:
*”الجزيرة .. وفاء وإنتماء”*
إستمر .. ونحن معك .. وكل بيوت مدني تفتح لك بابها بكل حب .
*والله من وراء القصد*

# الفورة _ مليون
# شكرا _ والي _ الجزيرة
# مدني _ كفر _ ووتر
—