حاج سيدأحمد لم يصمت عن الحديث ودائما ماتجده ينضم ،، ياناس هوى ابقوا عشرة على البلد وخلوا الف والدوران دااا البلد بعد ما خربوها عايزه تنعدل وتستعدل، لكن الشايفوا انا ما بودينا لي قدام، وانتوا اصلكم ما تسمعوا الكلام.
@ حاج حمد.. دا كلام شنو كمان ياحاج كيفن ما بنسمع الكلام.!!
& ما بتسمعوا الكلام وانا قلتوا ليكم في الجامع قبل كدا لكن للأسف ياحاج حمد ما قال المثل”زامر الحي لايطرب.
@ ياحاج سيدأحمد كمان بقيت متفلفس ومثتقف، الكلام دا جبتوا من وين من رأسك ولا من كراسك.!!
# انت ياحاج حمد قايليني خريج مدرسة حاجة عيشة، احرم انا مافاضي في خريجين جامعات الزمن دا. ما اصلهم دخول بالباب القدامى ومرقوا بالباب الوراني لا فهم ولا علم، الواحد راسوا قرعة ساكت كان سألتوا السودان نال الاستقلال سنة كم هو ماعرف.. ، لكن كان سألتوا منو احسن رقاص ولا احسن لاعب كورة في العالم يكون حافظوا حفظ.. ياخي ديل خليهم ساااااكت
@ والله حيرتنا اليومين شايفك مقبل على التعليم. َ
#حقيقة بلد عدد الجامعات والمعاهد العليا الحكومية فيها حوالي (39) ، عدد الجامعات الخاصة (116) مؤسسة تعليم عالٍ خاصة، فيها (17) جامعة و(65) كلية في الخرطوم بس أهلية وأجنبية، وبداية الحرب كلهن مرقن براا السودان.. ويظهر لسه دايشات..نرجع الخرطوم ولا ما نرجع..
@ انت ياحاج سيدأحمد ضروك في شنو..!!
# انت يا ابوالعريف ما اصلوا فهمك ذي الحجر دا.. لو كانت الجامعات دي نصهن زراعية ولا نصهن صناعية ودخلوا علينا التقانة في أرضنا الواسعة دي.. ومرقنا من دي حقت جدي ورثناها من قبل مية سنة ودي حقت حبوبتي حيازة وضع يد كنا بقينا فوق في السماء، لكن ما اصلوا فهم المسئولين زي فهمكم واحد، تفكرو في مصالحكم بس وما تشوفوا مصلحة البلد وين. ..ولمن نتكلم تقولوا الزول خرف وبقي يهضرب ساااااكت.
@لكن انت الناس عايزين يتعلموا والسوق عايز متعلمين خريجين جامعات.
#. اقول ليك يا حاج حمد خريج الجامعة كان ما يكون اساسوا قوي ومتين من الاول والله ينفع رقبتوا ولا ينفع اهلو ولا ينفع بلدو، واصلوا كان لي الجامعات الخاصة بتعلموا بالقروش عديييل وعلى حسب الجيب…وبنكك اليومين ديل.
@طيب نعمل شنو!!
# تعملوا شنو بعد ما الفأس وقع في الرأس هو تاني في عمل تاني ما خلاص جامعات كتار وتحصيل صفر على الشمال، تخريج وتخاريج وغنوة ورقيص ودقي يامزيكا.. احسن تقفلوا الموضوع على كدا.
@ كيفن يعني!!
# كيف هاك الزيت نقصو الجامعات الخاصة الاستثمارية دي وأضغطوها شديد عشان تصل لي قامة ومستوي جامعة الخرطوم وجامعة الجزيرة وامدرمان الاسلامية.. ودا رأي انا وما عندي غيرو كان ترضوا ولا تزعلوا وبعد داك وزير التربية والتعليم يخم نفسو ساااااكت ويشوف الموضوع ماشي على وين….!!!
……..
(خمة نفس)
وزارة الصحة في ولاية الجزيرة كل ماتقول خلاص كل المستشفيات المراكز الصحية تمام التمام، تجينا الشكاوى.. وطبعا ليس من المهنية تمشي للمسئولين تحكي ليهم فحوي الشكوى يبقى دااا نوع من الابتزاز ” العياذ بالله”…لكن علي
الأخوان في وزارة الصحة يسجلوا زيارة غير” معلنة” لمركز صحي دردق وعدد من المراكز.. عشان تشوفوا وتسمعوا.. وتسجلوا النواقص، وحاجة المرضى طالبي العلاج… وليكم وردة وزهرة.
