راي

(خمة نفس) ــ عبدالوهاب السنجك ــ ياخوي الحكاية دي ماشة على وين؟! ــ بعانخي برس

بعانخي برس

 

 

 

كتب لي أحد الأصدقاء بعد قرأ خبر زيادة تسعيرة المواد البترولية: “ياخوي الحكاية دي ماشة على وين؟!”

بالطبع أنا زيو واحد.. ما قادر أفهم ولا استوعب الحكاية، لأنو كل يوم عندنا حكاية جديدة مؤلمة تقطع المصارين، ويظهر الحكاية ليها عدة فصول وما ح تنتهي إلا بانتهاء البشر “المواطن”.

ارتفاع جنوني في كل شئ.. حتى غفير حمامات السوق العام كتب لوحة كبيرة عريضة:
“لقد تم رفع تسعيرة دخول الحمام نسبة لارتفاع الدولار”

يا عجبي..!!
الحمد لله ما كنا بنعرف الدولار والدرهم والريال واسع النسوان في الجبنة هن في حالة من النقاش حول كيف يتم كبح شرور وجنون الدولار.

قالوا ليهو: ليه كدا..؟!

أجاب بكل صرامة: انتوا بس تحاسبونا نحنا.. ما تشوفوا الناس الفوق ليه زادوا تسعيرة الجاز والبنزين؟! وانتو مش عارفين البتاع دا بتشطف بعربية، والعربية عايزة جاز، والجازولين في الطلمبة، وسيد المحطة عايز قروش حسب التسعيرة الجاية من فوق، والفوق جاتوا من البحر.. يعني المشتري السفينة في البحر هو الخاتي التسعيرة..!

وكدا يعني.. الحكاية ماشة على وين؟!

أنا أقول ليك.. بالرغم من أنني لست بخبير اقتصادي ولا أفهم في السياسة، زول وبس، بعد القرار الذي صدر من بنك السودان المركزي بتجميد نشاط 63 شركة، وحسب القرار ديل شغالين “غسيل بس”، حقو الحكومة تديهم أول حاجة “بل بس” في موية حارة، وبعدين نشرهم في شمس الله أكبر عديل.. لأنو ما قاعدين نخاف إلا من “البل”، وتاني مافي بل بحب.. لأنو كل حاجة بقت ما مفهومة لا من هنا ولا من هناك.. وبقينا لافين في الفاضي، كل يوم عندنا حكاية جديدة وماشة على وين مش معروفة.

وأنا أجيك من الآخر يا صديقي، لأنو الموضوع قرص خالص.. امبارح مشيت أجيب كرتة للحمام والدجاج ضحكوا علي.. وينك تاني تلقى كرتة.. الصحن يلحسوا لحس..

اها وصل الموضوع لغاية باقي فضلات المطاعم.. الباقي لينا شنو يا فردة..؟!
تقول لي الحكاية ماشة على وين؟!

خمواا نفسكم ساكت كان باقي ليكم باقي نفس.. الجاي أحلى..

خمة نفس أخير:
جيش واحد..
شعب واحد..

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى