كلام حاج سيداحمد مابقع في الواطة كلامو عديل لا بلف جاي ولا جاي يجيك ويقول ليك في وشك ودا الكلام البزعل الناس لانو زمن الغطغيت فات وغنايو مات..انا زول عارف نفسي بقول في شنو وكان غلطان قولوا لي غلطان في وشي عدييل يا حاج حمد، ما تختوا راسكم بين كرعيكم زي النعامة الخايفة من هبوب الصيف.. انا قلت حباب النافع حباب المالي يدو.
@ تقصد شنو بكلامك دا يا حاج سيداحمد
@ قصدي ما كلكم عارفنوا كويس لكن ما اصلكم ماشين في العوجع، الحلة دي قدر ما نقول يجيها فاعل خير يرفعا نلقاكم لهطوا الورا والقدام ولحستوا الصحن ما خليتوا فيهو شي، كلكم زي بعضكم ما بتعرفوا الحق وين وعايزين شنو للبلد دي، الزول البجيكم تقوموا وتقعدوا معاهو من دون فايده ما اصلوا هو ما فيهو فايده.
@ والله حيرتنا ياحاج اليوم خامي نفسك فينا شديد مالك يازول.
@ مالي ما انتوا عارفين البلد طالعة من حرب والمليشيا ما خلت فيها حاجة ومحتاجة لاي مليم احمر تقعدوا جاريين جاي وجاي مع الضيوف ضيف شنو الماعندو حاجة في يدوا من غير كلام خشم ساااكت وونسة وغناء ومهرجانات، ونحنا ونحنا حا نسوي ليكم ونسوي ليكم.. نحنا عايزين الزول المالي يدو بقراروا، مش لافح توبوا ساكت كفاية علينا كلام وجري عربات وصفافير ومصاريف في الفاضي..
نحنا ما محتاجين لكلام سياسة ما شبعنا منو من استغلال البلد دي نحنا محتاجين لعمل وفعل عدييل، الليلة مشروع الجزيرة الماسك البلد محتاج لقرار ووقفة قوية من فوق ما عايز كلام سياسيين ولاحاجة، لكن تقعدوا نحنا ونحنا سوينا وتركنا الكلام الزي دا ما بوصلنا لحل مشاكلنا، اها والحمد لله المهندسين في مصفاة الجيلي دورا الماكينات وناس الكهرباء شغالين شغل جد، وكما ناس الموية ما مقصرين لكن بقينا في المشروع كل واحد بجابد في الحبل، الري محتاج للقروش، وادارة المشروع قالت انا بشتغل براي “راقدة فوق راي” والي الجزيرة قال بدعم من عندي ما بقيف متفرج سااااكت.
@ يا حاج انت عايز تصل لي شنو؟
@ اطلق ضحكته ثم بحلق بعيدا.. قائلا ياناس الله يهديكم انتوا ما عارفين مصلحتكم وين بس فالحين في النضم ومسك المكرفون وعايزين التصوير ويجيبوكم في الجرايد. ونحنا ونحنا.. سيبكم من الكلام دا.. الزول البجيكم يقابل المسئولين بس، يقدم ما عندوا مافي داعي للوعودات حا نعمل ليكم ونعمل ليكم، هو الزول الما جايب معاهو بطيخة ولا كيس موز ساااكت ما فيهو فايده غير يخسر ناس البيت اكل وشراب ونضم في الفاضي، انا غايتوا كرهت السياسة ما هي اصلها سموها السياسة لانها كذب ونفاق سااااكت.
@ انت ياحاج سيداحمد كدي ادينا فرصة معاك للنضم.
@ نضم شنو تاني ما خلاص انبشقت واتهردت ما هرتوا مصارينا. الله يسامحكم امشوا شوفوا الجاييكم منو تاني عشان الناس تلهط وتتنفخ جيوبا وكروشا تتملي وتقعد وتقدل زي تمساح الدميرة الراقد فوق رملة جزيرة مساوي… امشوا خلاص.. كل زول يرقد علي الجنب البريحوا.
(خمة نفس)
محليات ولاية الجزيرة تحتاج لغربلة شديدة..كلامي ليك يا امين امانة الحكومة ومدير ديوان الحكم المحلي.. الله عارف…وانتوا عارفين وانا عارف.. خمواااا نفسكم سااااكت
