*الفورة مليون* ــ *الشافعي طاشين* ــ *نصحت لكم ولم تستبينوا النصح إلا ضحى الغد .. الكلام ليك يا محلية مدني الكبرى* ــ بعانخي برس
بعانخي برس
الكلام ليك يا محلية مدني الكبري
قلناها ليكم من بداية الأزمة الإقتصادية .. وتذبذب أسعار الوقود ..
إلتفتوا لأصحاب عربات النقل الوسيط .. *أمجاد .. حافلات .. ركشات ..*
ما تخلوا المواطن تحت رحمتهم .. *لو عندهم رحمة*..
قلنا ليكم .. المواطن الغلبان ده أمانة في رقبتك ..
واليوم .. المواطن تحت رحمة السواق .. يعمل فيه العاوزه .. بكل صلف وإستكبار وعنجهية ..
وهو ما حادث الآن في الموقف الرئيسي بمدني .. *لو بتمروا بعنده يا سادة يا كرام ..*
*المواقف فاضية ..*
أي والله .. المواقف فاضية ..
والعربات شغالة بمزاج أصحابها .. حسب الأسعار العاوزنها ..
والماعجبو .. يركب *خ 11*.. يعني كرعيو ..
وآخر البدع .. تقسيم الخط لجزئين لمضاعفة السعر ..
*عليكم الله يا ناس المحلية .. قربوا على الناس الغبش المساكين .. أسألوهم عن المواصلات .. والله تسمعوا العجب ..*
أم بتقول ليك: بقيت ما بقدر أودي ولدي المدرسة .. حق المواصلات بقى أكتر من حق الفطور ..
موظف بقول: المرتب كلو بروح مواصلات ..
طالب جامعي بقول: بقيت أمشي برجليني من بانت للنشيشيبة .. عشان أوفر حق الركشة ..
ده الحاصل .. وانتو نايمين ..
*والله نقول لناس المالية وإدارة البترول .. كتر خيركم ما قصرتوا تب ..*
وبحسن نية .. وفرتوا الوقود بالتمام لعربات المواصلات في أحلك الظروف ..
في عز الأزمة .. كنتوا بتدوهم حصتهم .. المخصصة لنقل المواطنيين لاعمالهم ولمدارسهم وللمستشفيات .. عشان المواطن ما يتأذى ..
*لكن بعد يكبوا منكم .. بمشوا وين؟ دي مسؤولية المحلية ..*
يكب الوقود المخصص للمواصلات .. ويمشي يشتغل بمزاجو .. ويقسم الخط .. وما يدخل الموقف أصلاً ..
ويرجع يبكي يقول ما عندنا وقود ..
من المسؤول؟
*كلامنا لناس المحلية .. ديوان الولاية .. أم المدائن .. أرض المحنة ..*
*حددوا الأسعار .. إنتو .. ما تخلوها لأصحاب المركبات والركشات ..*
إنتوا الدولة البتجيب الوقود وبتسفلت الطرق وبتحدد الخطوط .. إنتو الهيبة ..
ما ممكن تسعيرة المواصلات يحددها سواق أمجاد أو ركشه ..
الدولة هي البتحدد .. وتكتب التسعيرة في الموقف .. وفي العربية .. كبيرة .. واضحة ..
*اضبطوا المواقف ..*
جيبوا مشرفين .. جيبوا عساكر .. جيبوا متطوعين .. لكن اضبطوا المواقف ..
الموقف ما يكون فاضي والسوق مليان عربات واقفة برة تشحن على كيفها ..
*ارصدوا أي صاحب مركبة مواصلات إستفاد من حصة الوقود المخصصة للمواصلات ولم يدخل الموقف .. وإتخذوا معاهم إجراءات صارمة تبرز هيبة الدولة ..*
اسحبوا الترخيص .. امنعوا الحصة .. غرّموا .. احجزوا العربية ..
ورونا هيبة الدولة ..
ما ممكن المالية توفر .. والبترول يدي .. والمحلية تتفرج ..
ما ممكن المواطن يدفع تمن فشل الرقابة ..
يا محلية مدني الكبرى ..
يا *ديوان الولاية .. يا أم المدائن.. يا أرض المحنة ..*
المواصلات ما رفاهية .. المواصلات حق ..
والمواطن الغلبان .. ما عندو غيركم بعد الله ..
اصحوا ..
قبل ما ضحى الغد يجي .. وتلقوا الناس كلها بتمشي كداري .. وتدعي عليكم ..
*نار وصوت عنج .. وحنضل في الحلق .. لأننا نحب مدني .. ونريد لها مواقف ومواصلات تليق بأم المدائن ..*
والفورة مليون .. للمواطن الغلبان ..
# الفورة _ مليون
# المواقف _ فاضية
# وين _ المحلية
