راي

*الفورة .. مليون* ــ *الشافعي طاشين* ــ *سفلتت الطرق في مدني .. 20 كلم حيرتنا عديييل .. يا فرحة ما تمت* ــ بعانخي برس

بعانخي برس

 

 

 

والله يا جماعة .. ملف سفلتت الطرق ده .. حيرنا عديييل كده .. حيرنا .. وجننا .. وزهجنا خلاص ..
بعد وعد الوالي .. وبعد أن بدأت السفلتة في الأسبوع الأول من شهر نوفمبر .. الولاية كلها ضحكت .. وصفقت .. والأسافير ضجت .. وقلنا خلاص .. مدني حترجع مدني .. مدني حتلبس توبها الجديد .. مدني حتتلمع ..
لكن .. يا فرحة ما تمت ..
فجأة .. توقف العمل .. توقف في شارع وقيع الله .. بطول لا يتجاوز 2 كلم .. 2 كلم بس .. وبعدها .. سكوت .. صمت .. لا حس .. لا خبر ..
وحتى اليوم .. ومافي أي زول طلع قال لينا الحاصل شنو؟؟
لا وزارة طلعت بررت .. لا مهندس طلع إعتذر .. لا مقاول طلع قال عندي مشكلة ..
سكتوا كلهم .. ونحنا منتظرين٦.. ومنتظرين .. ومنتظرين سفلتت 11 شارع قبل نهاية العام الجاري ..
11 شارع .. وعدونا بيها .. والعام باقي ليه شهر واحد .. ونحنا لسه في 2 كلم ما تمت ..
*وين الحاصل؟*
يا وزارة .. يا معنية .. إنتو وين؟
الوزارة المعنية مشغولة بمدير مصلحة الأراضي وقفوا .. مدير مصلحة الأراضي رجعوا .. وقفوا .. رجعوا .. وقفوا .. رجعوا ..
ونحنا شوارعنا حفر .. شوارعنا تراب .. شوارعنا غبار .. شوارعنا موية راكدة .. شوارعنا تكسر العربات .. وتكسر ظهور المواطنين .. وتكسر قلوبنا .
يا جماعة .. مصلحة الأراضي مهمة .. لكن المواطن ما بيأكل مصلحة أراضي .. المواطن داير شارع يمشي فيه .. داير شارع يودي أولاده المدرسة .. داير شارع يودي مريضه المستشفى .. داير شارع يمشي فيه بدون ما عربيته تتكسر .. وبدون ما ملابسه تتملي تراب ..
*20 كلم .. وينها؟*
20 كلم .. قالوا لينا 20 كلم في مدني .. ونحنا صدقنا .. وفرحنا .. وهللنا ..
لكن 20 كلم دي وين؟ في الورق؟ في الإجتماعات؟ في الوعود؟ ولا في الأرض؟
2 كلم في شارع وقيع الله .. ووقفت .. طيب الباقي 18 كلم وين؟
هل السفلتة كانت مجرد شو؟ مجرد لقطة؟ مجرد إفتتاح وتصوير وخلاص؟
هل نحن مواطنين نستاهل الشو؟ ولا نستاهل الشغل الحقيقي؟
يا والي الجزيرة .. أنت وعدت .. ونحن صدقناك .. لأنك رجل صادق .. ورجل إنجاز .. ورجل قال وفعل في ملفات كثيرة ..
لكن في ملف الطرق .. الوعد ما تم .. والعمل وقف .. والمواطن زهج ..
نحن لا نطلب المستحيل .. نطلب توضيح .. نطلب شفافية .. نطلب زول يطلع يقول لينا .. الحاصل شنو؟ المشكلة وين؟ المقاول وين؟ القروش وين؟ الآليات وين؟ متين الشغل حيرجع؟
أليس من حق المواطن أن يعرف؟ أليس من حق مدني أن تعرف مصير شوارعها؟
*مدني تستاهل أكتر من كده*
مدني .. عاصمة الجزيرة .. مدينة العلم .. مدينة الثقافة .. مدينة الحضارة .. مدينة إستقبلت السودان كله في الحرب .. مدينة فتحت بيوتها للنازحين .. مدينة صبرت .. وتحملت .. وقدمت ..
هل جزاؤها شوارع محفرة؟ هل جزاؤها 2 كلم وقيف؟ هل جزاؤها صمت؟
لا .. والله لا ..
مدني تستاهل شوارع مسفلتة .. منارة .. نظيفة .. تستاهل 11 شارع .. وتستاهل 20 كلم .. وتستاهل أكتر ..
لأن مدني هي الواجهة .. هي العاصمة .. هي التي ستستضيف الدورة المدرسية القومية .. هي التي ستستقبل ضيوف السودان .. فكيف نستقبلهم وشوارعنا بهذا الحال؟ كيف نقول لهم تعالوا .. ونحن شوارعنا ما جاهزة؟
من*الفورة .. مليون* .. يا وزارة التخطيط .. يا كل مسؤول عن الطرق ..
اتركوا القضايا الهاشمية .. اتركوا الصراعات الصغيرة .. اتركوا وقفوا ورجعوا ..
وتعالوا للشارع .. تعالوا للمواطن .. تعالوا للعمل ..
الشغل وقف ليه؟ ورونا .. الشغل حيرجع متين؟ ورونا .. الـ 11 شارع حتتسفلت متين؟ ورونا .. الـ 20 كلم حتخلص متين؟ ورونا ..
زهجنا من الوعود .. زهجنا من الصمت .. زهجنا من البدايات التي لا تكتمل ..
نريد سفلتة .. لا شعارات .. نريد أسفلت في الأرض .. لا أسفلت في الورق .. نريد شغل .. لا صور ..
يا والي الجزيرة .. تدخل .. كما تدخلت في ملفات كثيرة ونجحت .. تدخل في ملف الطرق .. وأنقذه .. قبل نهاية العام .. قبل أن يضيع الوعد .. وتضيع الثقة .. وتضيع مدني في التراب والغبار .

# الفورة .. مليون
# نريد سفلتة .. لا شعارات
# نريد أسفلت في الأرض .. لا أسفلت في الورق
# نريد شغل .. لا صور..

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى