راي

(خمة نفس) ــ عبدالوهاب السنجك ــ مزارعو مشروع الجزيرة.. رغم كل شي.. زارعين ــ بعانخي برس

بعانخي برس

 

 

 

بالرغم من الأوضاع الراهنة..
وما يقف من أمام السودان من متاريس داخلية وخارجية..
والصراخ بأن هنالك مجاعة قادمة قد تضرب البلاد..

مزارع الجزيرة ما قعد يعاين..
مزارع الجزيرة ما قعد يندب في الحظ.
مزارع الجزيرة شال طوريتو.. ومشى الغيط..وما ح يقيف لانو دا وطن حدادي مدادي.

والجاز وصل والطريق بقى سالك ومافي مطبات ولا قلنا وقالوا..ولا رسائل وخطابات إحباط.

جهود كبيرة يبذلها محافظ مشروع الجزيرة.. المهندس إبراهيم مصطفى على.. في سبيل انسياب الجازولين للمشروع..

وصلت حتى الآن أكثر من 210 ألف جالون جازولين.. من جملة 300 ألف جالون، تمت المصادقة عليها من رئيس مجلس الوزراء.. عبر وزارة المالية الاتحادية..
وأسهمت في انسيابها العديد من الجهات ذات الصلة بالمشروع… كلام ما فيهو كلام، نقول مبروك خطوة للأمام. لا

210 ألف جالون..
أحدثت حراكاً وسط الغيط..
وبخاصة في تحضيرات أراضي محصول القمح والبقوليات.. وغيرها من المحاصيل الشتوية..

والغيط اتحرك..
والمزارع بقى يحضر..
الجاز وصل.. يعني الزراعة بدت..

الترع بتتنضف من الحشائش.. ونقصر الكلام.

وعلى حسب الكلام الجانا الآن أكثر من 102 من آليات الحفر تعمل.. لإزالة الأطماء والحشائش من قنوات الري.. على مستوى الجزيرة والمناقل.. تحت إشراف إدارة الري بالمشروع..

102 آلة..
شغالة تنضف في الترع.. وتفتح في القنوات..
عشان الموية تصل في وقتها..
عشان القمح ما يعطش..
عشان المزارع ما يصرخ: الموية ما وصلت..

و تقاوينا من أرضنا

في إطار اتجاه الإدارة العليا نحو توطين إنتاج التقاوي من كل المحاصيل..

دشّن المهندس إبراهيم مصطفى على.. محافظ مشروع الجزيرة.. انطلاقة زراعة 20 ألف فدان بتقانات عالية.. بتفتيش نور الهدى بالقسم الوسط.. لإنتاج تقاوي القمح بالمشروع.. لتغطي مساحة 500 ألف فدان الموسم الزراعي الجاي.

20 ألف فدان هسي..
عشان 500 ألف فدان بكرة..

دا معناهو..
تاني ما ح نشحد التقاوي من برة..
تاني ما ح ننتظر باخرة..

تقاوينا من أرضنا..
وقمحنا من أرضنا..

السودان لن يجوع مادام في أرض ومزارع وإدارة.

رغم التحديات التي واجهت الموسم الزراعي..
إلا أن إنتاجية الذرة فاقت الـ 2 طن للفدان في بعض التفاتيش بالمشروع..

2 طن للفدان..
في ظل الحرب..
في ظل الغلاء..
في ظل كل التحديات..

دا تأكيد..
أن السودان لن يجوع..
وأن الجزيرة لسه بخيرها..
وأن المزارع لسه قادر..

يا جماعة..
الناس برة بيصرخوا: مجاعة.. مجاعة..
ومزارع الجزيرة بيرد بالفعل.. ما بالكلام..
بيرد بالقمح.. وبالذرة.. وبالـ 2 طن للفدان..

المزارع دا..
هو البطل الحقيقي..
هو جيش الإنتاج..
جيش القمح..
جيش الحياة..

فـ يا إدارة المشروع..
واصلوا ما تقيفوا والطريق طويل والتحدي بالإنتاج، والناس البدق في الطبول ما تسمعوا ليهم طنشوهم بس.

ويا مزارع الجزيرة..
ازرع.. وما تقيف..
أرض الجزيرة أرض خير.. وما بتبور لو لقت زول يزرعها..

خمة نفس أخيرة:
جيش واحد..
شعب واحد..
وقمح واحد.. يكفي السودان كلو..

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى