لعبة الملوص هي لعبة مجنونة من ألعاب القمار..تلعب مابين لاعبين فقط.. الملوصية يعني يملصوك ما يخلوا ليك جنيه في جيبك..
أتذكر جيداً في موقع موقف الحصاحيصا الخرطوم حاليا، وتحت أشجار النيم ذات السيقان الكبيرة، وفي تلك الحقبة من الزمن العجيب – أي ما قبل قوانين سبتمبر – كان هناك عالم خاص..
كيفن يعني ما تسألوني!!
أحسن نتكلم في موضوع الحكومة ولعبة الملوص، وشجرة النيم، والزول اللابس الجلابية القيافة والعمة الباريسية، ومن حوله قاعدين الركبية عاملين فيها إنهم خرتوا الزول وملصوهو لآخر حاجة.. ما خلوا ليهو قرش في جيبو وتسمع الكواريك: أديني آخر يدي.. ودا كلو عشان يصطادوا فريسة جديدة، ما فاهم انها حا وتقع في شرك التمليص.
أها اللعبة الملوصية كيف.. أقول ليكم وأنا ما مسؤول من الحقوق الفكرية للعبة،هاكم ليها: خيط كتان اللمبة الزمان ديك يتلف دائري، وعشان تكسب لازم يكون العود”عود الكبريت” يدخل في وسط الخيط، وعند السحب يكون في قلب الخيط “ظابط” كدا تكسب وتلم القروش عليك.
الجماعة يكسبوك المرة الأولى والثانية، يعني يطمعوك لمن تتحداهم وتخت العندك الوراك والقدامك.. وهنا يبدأ الفن ويجروك لي ورا، وكل مرة تقول ممكن أرجع الخسرتو وتخت وانت تخسر.. وتبدأ من العربية والبيت لمن تصل العمة والمركوب.
وكدا تكون اتملصت، ويبدأ انسحاب الركيبة التكتيكي واحد بعد واحد ويخوك مع خيط اللمبة وقشة الكبريت قاعد متمحن.
بالله عليكم أها دا مش الحاصل علينا يا حكومة الأمل؟! ما كفاية مافيا الدولار والمواد البترولية وتجار الازمات الهلكوا المواطن..كان انتو لاعبين معاهم ملوص كلمونا لعشان نعرف!!
مرة تغلبوهم ومرة يغلبوكم، والمواطن هو المملوص في النص.. كل يوم سعر جديد، وكل يوم أزمة جديدة، وانتو قاعدين تتفرجوا.
“خمة نفس أخيرة”
المملوص في النهاية بقوم مفلس.. ونحن خايفين المواطن يقوم من الصباح مفلس ومملوص من الحكومة ومن المافيا سوا.. ألحقونا قبل ما العمة والمركوب يروحو كمان.. يشيلوهم الجماعة.
جيش واحد..
شعب واحد..
