خمة نفس ــ عبدالوهاب السنجك ــ حجيتكم ما بجيكم.. خيراً جانا وجاكم ما أكل عشانا وعشاكم !! ــ بعانخي برس

دي بقت حكايتنا.. حكاية الناس اليومين ديل.. كل زول شايل ليهو تلفون “موبايل” وعامل فيها محلل استراتيجي وخبير عسكري وسياسي واقتصادي واجتماعي.. الحكاية شنو؟!
بس نقول حجيتكم ما بجيتكم خيرا جا وجاكم ما أكل عشانا وعشاكم.

الجماعة ماشين جايين ما عارفينهم بنقولوا في شنو وعايزين شنو!!
الواحد يصحى الصباح يكتب بوست يشكك في الجيش.. والمساء يكتب بوست تاني يبكي على البنزين.. ونص النهار يفتي في كلام مناوي!!

الحكاية طولت شوية لكن آن الأوان تقيف لحد هنا.. وإن شاء الله تنقفل.. ونرتاح من قالوا وقلنا وكترة الكلام الما بجيب حقو!!

تعالوا نمسكها واحدة واحدة..

الأولى: بل بس..

قواتنا المسلحة الباسلة والقوات المساندة لها والمشتركة والمستنفرين تتحرك في كل المحاور.. من كردفان لدارفور.. وتتقدم منتصرة.. وكل يوم تسجيل دخول جديد لمنطقة جديدة.. دا هو الشغل.. دا هو عصر الزيت ذاتو.. دا هو البهمنا في الوقت ده.

أما ناس اللايفات والتحليلات .. خليكم في تنظيركم.. الجيش ما فاضي ليكم.. الجيش شغال بي بندقيتو ما بي كيبوردو!! وانتو عارفين كلام الجيش شنو!!

التانية: القائد مناوي وما أدراك ما مناوي..

القائد مني أركو مناوي قال كلام عدييل.. كلام زول مسؤول وقائد حقيقي.. لكن الجماعة الطابور الخامس طوالي مسكوا الكلام وفسروهو حسب هواهم المريض.. دا ما قال وقال.. وفلان زعلان وعلان ح يمرق من البلد.. ياخي ما يمرق.. هم المرقو شوية؟ ما لافين في الفنادق زي “السورو”!!

صحيح هو قال.. لكن هو قاصد شنو؟!
قاصد يصلح.. قاصد ينبه.. قاصد يقول يا جماعة انتبهوا.. لكن انتو خليتوا الميديا تدور في الفاضي وتبلع الطعم!!

اها أسع الراجل طلع ووضح كلامو وختاها ليكم واضحة زي عين الشمس: “نحنا ما ح نتمرد.. وما عندنا نية نتمرد.. والعايز يتمرد يتمرد براهو”

اها بعد الكلام الواضح دا.. الناس الشنت هجوم على مناوي ونهشت لحمو وكتبت فيهو المقالات.. ح تقيف وين أسع؟! ح تؤدي وشها وين من الحقيقة؟!

الأوراق ما اختلطت.. كل حاجة في محلها.. والما فاهم يبقى هو المختلط.. والمشتركة في الميدان بتموت مع الجيش كتف بكتف.. دا هو الواقع.. ما واقع غرف الواتساب!!

التالتة: أزمة البنزين والجاز..

نعم في أزمة.. نعم في صفوف.. لكن دي أزمة مفتعلة وماشة على انفراج.. الحكومة شغالة ليل نهار.. وبكرة ولا بعد بكرة كل محطات التوزيع ح تكون فاضية ما فيها ولا موتر واقف..

وصحن الفول المصري ح يرجع زي ما كان زمان.. وست الشاي ح ترجع تبيع.. والمواصلات ح ترجع.. والبقول غير كدا دا زول داير يخلق بلبلة ساكت وما عندو موضوع..

الرابعة: جزيرتنا الخضرا..

ولاية الجزيرة تتعافى بسرعة الصاروخ.. ودا ما كلام إنشاء.. دا واقع شايفنو بي عيونا.. الأسواق رجعت.. المدارس رجعت.. المستشفيات شغالة.. والمشروع رجع يزرع.. لكن عايز دفرة من الحكومة عشان يلحق الموسم الشتوي لأنو طلع من الصيفي صفر اليدين.

والوالي الخير شغال ليل نهار.. وحكومتو شغالة.. والما شايف التعافي دا يبقى أعمى.. أو في نفسو حاجة!!

واليوم امتحانات المرحلة المتوسطة في ولاية الجزيرة.. والعسّناهو نكرو.. والسنة الدراسية المضغوطة ماشة بي خيرها وشرها.. والقراية بدت والمدارس رجعت تدق الجرس.. لكن عايزين وقفة أقوى من كدا.. وبالذات من المرحلة الابتدائية لأنها هي أساس التعليم.

خمة نفس أخيرة:

يا جماعة.. بطلوا تنظير.. بطلوا إشاعات.. بطلوا تكسير مجاديف.. البلد دي ماشة لقدام بي جيشها وشعبها.. والبشوفها واقعة ولا ما نافعة.. يشوف ليهو بلد تانية يمشي عليها.. ولا يسكت يخلينا في حالنا راضيين بيها.

نحنا قاعدين هنا متسمرين في وطنا.. مع جيشنا.. مع فولنا وطعميتنا.. الما عاجبو يقع البحر.

جيش واحد.. شعب واحد.. والباقي كلو هين..بنقدر عليهو.