حاج سيد أحمد:
قاعد تحت النيمة، بشرب في الجبنة، وفاتح ورقة الاستحقاق وبطنو طامة…
يا حاج حمد، ألحقني عليك الله. شوف الورقة دي، قالوا دا استحقاقي بعد 20 يوم مراقبة في الشهادة.. 480 ألف!
حاج حمد:
بصوت ضعيف مالك يا أستاذ، ثم قعد في البنبر ومد رقبتو في الورقة…
480 ألف؟ والله يا حاج سيد أحمد دي ما تامة حق خروف الضحية. دي كم بالدولار كدي؟
حاج سيد أحمد: ضربها في التلفون الحاسبة…
قالوا 115 دولار يا حاج حمد. 115 دولار بس، بعد سهر وحراسة ومسؤولية لو ورقة طارت منك يدخلوك السجن!
حاج حمد:
شهق وبخت يدو في راسو…
يا زول! 115 دولار؟ والله العامل المعانا في المركز أدوهو 130 ألف.. حسبتها ليهو طلعت 14 دولار.
يا حاج سيد أحمد، 14 دولار دي في دبي ما بتجيب ليك عشاء!
حاج سيد أحمد:
رمى الورقة وقعد يضحك ضحك الواجعو…
والأغرب يا حاج حمد، عارف المراكز البره؟ قال ليك كبير المراقبين هناك بدوهو 4 ألف يورو…
أضربها كدي!
حاج حمد:
طلع تلفونو وبدأ يحسب ويسبح…
أعوذ بالله… 4 ألف يورو دي يا حاج سيد أحمد 18 مليار بالقديم!
يعني انت تشتغل 20 يوم بي 115 دولار، وهو يشتغل نفس الشغل بره ياخد قدر مرتبك بتاع 156 سنة!
دا لو عمر النبي نوح ما بتلمها!
حاج سيد أحمد:
انت يا حاج حمد زول 14 دولار بكون عامل كيف؟
حاج حمد:
مسكين والله… 130 ألف يعني الزول الشغال غسال عربات أحسن منو. لانو ممكن في اليوم الواحد يغسل ليهو أكثر من عشرة عربات.. يعني شَهرو بالشي الفلاني..
حاج سيد أحمد:
يعني يا معلم ويا أستاذ بقت وصفة من دون علاج.. تعب ساااكت.
حاج حمد:
انت يا حاج شايف ليك زول قدم شهاداتو عشان يعينوهو مدرس؟ كلهم مشوا على الدهب.. والمدارس بقت فاضية، تلقى المدرسة فيها معلم واحد شايل الحصص كلها.
حاج سيد أحمد:
طيب لجنة المعلمين رأيها في الموضوع دا شنو!!
حاج حمد:
طلعت بيان شديد اللهجة رافضا للحاصل والفرق الواضح الشاسع مابين الأستاذ المراقب للامتحانات داخل السودان وخارج السودان. وقالت دااا ظلم عديل وتاني خلاص طفح الكيل وما حانسكت على الموضوع دا…
حاج سيد أحمد: ضرب كف بي كف واتنهد…
طفح الكيل؟ والله يا حاج حمد الكيل دا طفح من زمن، ودفق في الواطة ذاتو.
لكن البيان دا سمح، قالوا شنو تاني غير “ما حنسكت”؟
حاج حمد:
شال الورقة بتاعة البيان من جيب الجلابية، فرداها…
شوف يا حاج سيد أحمد، قالوا رافضين الاستحقاقات دي رفض قاطع. قالوا ما بتليق بدور المعلم ولا بالمسؤولية الوطنية.
وقالوا دا فساد ومحسوبية عديييل، المراكز البره بقت تُمنح بالولاء، ما بالكفاءة.
حاج سيد أحمد: اتلفت عليهو مندهش…
بالولاء؟ يعني ود فلان داك السافر براا يراقب، مشى عشان هو كفاءة؟
يا زول دا خطو ما بتعرف تقراهو!
حاج حمد:
ضحك ضحكة مُرة…
الكفاءة الوحيدة العندو “كفاءة الانتماء” يا حاج سيد أحمد.
قالوا في البيان استحقاقو 4 ألف يورو، يعني 18 مليار… وانت هنا بي 480 ألفك دي ما بتفتح ليك دكان طبلية.وخليك انت ياحاج سيداحمد العامل الاستحقاقاتو 14 دولار تفتكر بكون راضي يعني 130الف جنيه بس حا تجيب ليهو شنو!! انت تتفق معاي انو ما تجيب ولا حاجة تعب ساااااكت.
حاج سيد أحمد:
هز راسو وعدل عمتو… خلينا من موضوع القروش والدولار ياحاج حمد
طيب اللجنة دي قالت حتعمل شنو؟ ولا كلام ساكت؟
حاج حمد:
أشر ليهو بي أصبعو…
لالا يا زول، المرة دي شكلهم جادين. قالوا حيحمّلوا وزارة التربية المسؤولية كاملة.
وطالبوا بمراجعة عاجلة للاستحقاقات.
والكبيرة يا حاج سيد أحمد… قالوا “سنقوم بنشر الأسماء والمواقع وتكرار الفرص إن لزم الأمر”.
حاج سيد أحمد:
نط من البنبر…
أمانة ما قَصّروا! خلي الأسماء تطلع، وخلي الناس تعرف البسافر كل سنة منو، والبقعد يتفرج منو.
والله الفساد دا عينو قوية خلاص، لكن السترة انقدّت.
حاج حمد:
كبّ الجبنة في الفناجين وقال…
عارف يا حاج سيد أحمد، أكتر حاجة عجبتني في البيان؟
النكزة دي: “يا إدارة الامتحانات، جنيه وليس جنية”.
يعني يا جماعة اهتمامكم بالدولار خلاكم تنسوا العربي زاتو!
حاج سيد أحمد:
شال الفنجان ونفخ البخار…
والله صدقت. خايف بكرة يكتبوها “دولارية” بدل “دولار”.
غايتو يا حاج حمد، زي ما قالت اللجنة: “العدالة للمعلم… والكرامة للعامل… والنزاهة للتعليم”.
وكان ما جات العدالة، الوداهو البحر ما بجيب موية.
حاج حمد:
ختمها ورمى البشري…
خلاص يا حاج سيد أحمد، بعد دا إلا نرفع شعارنا برانا:
لا_لظلم_المعلم
لا_للمحسوبية_والفساد
ومحل الرهيفة إن شاء الله تنقد، والبركة في لجنة المعلمين كان ثبتوا.. وإنشاء الله يثبتوا.
(خمة نفس)
كل يوم المواد البترولية بنزين جازولين في شأن طالعة مش نازلة خالص.. أصحاب العربات يشتكوا.. المركبات العامة ما مخارجة معانا.. الركشات مش طالع من غير ضمان حق الجالون، سيد اللبن رفع السعر و.. و.. خلوها ساكت.. أما تجار الأزمات خاتين رجل فوق رجل.. ودقي يامزيكا..
(خمة نفس)
الأول سلم…الثاني ماشي على طريق التسليم..
(شعب واحد.. جيش واحد).
