(خمة نفس) ــ عبدالوهاب السنجك ــ التنقلات الواسعة في مصلحة أراضي الجزيرة.. هل هي من أجل التجويد.. أم من أجل التمكين؟! ــ بعانخي برس

قرارين طلعوا ورا بعض في مصلحة أراضي الجزيرة.. وعملوا زوبعة في المصلحة كلها والرأي العام.

القرار الأول: من الوزير المهندس أبوبكر عبدالله محمد.. تكليف الأستاذة سيدة علي خضر نائباً لمدير عام مصلحة الأراضي.

القرار الثاني: من المدير العام الأستاذ نادر أحمد عبدالرحيم.. تنقلات واسعة شملت 15 مديراً وإدارياً.. بين الرئاسة والمحليات.. والتنفيذ خلال 72 ساعة فقط!!
وهنا تكمن خطورة القرار الأخير:
والسؤال البيدور في كل مكاتب الأراضي في مدني والمحليات:
هل التنقلات دي فعلاً من أجل التجويد.. ولا في حاجة تانية؟!
أم جاء القرار لإبعاد كل الذين عملوا إبان فترة مدير مصلحة الأراضي السابق ومدير إدارة التخطيط.

نحن ما ضد التجويد.. بالعكس.. نحن أول ناس بنطالب بيهو!!
مصلحة الأراضي هي أخطر مصلحة في الولاية.. لأنها بتمسك ملف الأرض.. والأرض في الجزيرة هي العرض والشرف والقروش كمان!!

لكن عشان نقول تجويد.. لازم نجاوب على 5 أسئلة.. والمواطن داير إجابة ليها:

1. ليه 15 مرة واحدة؟!
التجويد بيكون بالقطاعي.. مدير مدير.. مكتب مكتب.. حسب الأداء والتقارير..
لكن 15 مدير وإداري في قرار واحد.. وفي 72 ساعة بس.. دي ما اسمها تجويد.. دي اسمها “قلبة” كاملة!! من تحتها سر كبير قد تكشفه الأيام!!

نقول القلبة دي.. لو ما وراها دراسة أداء وتقارير سرية سنوية واضحة.. بتبقى إرباك للعمل.. المواطن المسكين الداير خطة إسكانية أو هنالك من يستطيع مادياً شراء قطعة تجارية أو معامل.. ح يلقى المدير الجديد لسه ما عرف ملفات المكتب وين!! في أي رف أو درج ولو ما اتعامل مع الموظفين كويس هنا تبدأ “الجرجرة”.

2. وين معايير التجويد؟!
القرار قال: “في إطار ترتيب وتنظيم العمل وتجويداً للأداء”..
كلام جميل.. لكن وين التقرير؟! وين التقييم؟!
منو المدير الكان مقصر وتم نقله؟! ومنو المدير الكان ممتاز وتمت مكافأتو؟!
لو ما في معايير معلنة.. الناس ح تفهم التنقلات دي على أنها تصفية حسابات.. أو ترضيات.. أو توزيع مناصب للموالين!!

3. الرئاسة.. بقت ملاذ آمن؟!
لاحظوا معاي في الكشف:
حسن آدم سليمان من الكاملين إلى رئاسة الأراضي
أحمد أبوعاقلة من أم القرى إلى رئاسة الأراضي
مصطفى أحمد بركات من جنوب الجزيرة إلى رئاسة الأراضي
مرام محمود من جنوب الجزيرة إلى رئاسة الأراضي

4 مدراء اتسحبوا من المحليات وجابوهم الرئاسة!!
طيب.. المحليات البقت فاضية دي.. منو ح يشتغل فيها؟!
وهل الرئاسة محتاجة كل العدد ده؟! ولا الرئاسة بقت “مخزن” للناس المغضوب عليهم.. أو “مكافأة” للناس المرضي عنهم؟!
“مش عارفين والله”

4. تبادل الكراسي.. هل بيحل المشكلة؟!
د. أحمد المصطفى من الحصاحيصا إلى مدني شرق
منيرة سيد من مدني شرق إلى الحصاحيصا

تبادل كراسي بس!!
لو المدير فشل في الحصاحيصا.. ح ينجح في مدني شرق كيف؟!
ولو نجح في مدني شرق.. ليه تنقلو الحصاحيصا؟!
التجويد ما بتبادل الكراسي.. التجويد بتغيير الأداء.. وبمحاسبة المقصر.. وبمكافأة المنجز!! ولا أنا غلطان.

5. سيدة علي خضر.. نائبة ومساعدة؟!
في قرار الوزير: نائباً للمدير العام لمصلحة الأراضي
وفي قرار المدير: مساعد المدير العام..
طيب.. هي نائبة ولا مساعدة؟! والفرق بينهم شنو في الصلاحيات؟!
عايزين نفهم ونتعلم!!
والمواطن ح يمشي لي منو لو عندو مظلمة؟! للمدير؟! ولا للنائبة؟! ولا للمساعدة؟!
عايزين إجابة يا سادة!! من دون زعل
طبعاً نحن ما عندنا مشكلة مع الأستاذة سيدة.. واظنني التقيتها مرة واحدة على عجل، ونتمنى ليها التوفيق.. لكن وضوح الصلاحيات هو أول خطوة في التجويد.. لو الصلاحيات ما واضحة.. ح تحصل ربكة.. والربكة في الأراضي معناها ضياع حقوق المواطنين!!

خمة نفس أخيرة:

يا وزير التخطيط.. يا مدير الأراضي..
نحن ما ضد القرار.. نحن مع التجويد قلباً وقالباً..
لكن التجويد ما بيكون بقرار ينفذ خلال 72 ساعة.. و15 نقلة مرة واحدة!! معقول بس.. ما اظنوا قبل كدا حصلت!! ولا ح تحصل،
الله يستر من الجاي.

لكن نقول ليكم التجويد بيكون بـ 3 حاجات:
1. أعلنوا معايير النقل.. منو اتنقل ليه؟!
2. أعلنوا خطة الـ 100 يوم الأولى.. ح تعملوا شنو في الأراضي؟!
3. افتحوا باب الشكاوى للمواطن.. لو مدير جديد قصر.. المواطن يشتكي لي منو؟!

مصلحة الأراضي ما مكتب.. مصلحة الأراضي هي أرض الناس.. وبيوت الناس.. وورثة الناس!!
وأي قرار فيها.. لازم يكون شفاف.. زي الشمس في عز الصيف!!
ما تتعبوا المواطن أكتر مما هو تعبان كفاية عليهو الله يرضى عليكم.

لو التنقلات دي فعلاً للتجويد.. أهلاً وسهلاً.. ونحن أول الداعمين..
ولو كانت لغير ذلك.. فالتاريخ ما بيرحم.. والمواطن ما بينسى!!

التجويد ما قرار.. التجويد فعل!!
والفعل ح يكون مسجل في سفر التاريخ..

جيش واحد..
شعب واحد..