(خمة نفس) ــ عبدالوهاب السنجك ــ البكاء بالصوت العالي والصراع لاجل الكرسي ــ بعانخي برس

الكرسي الدوار زي بيت الايجار.. الشهر يجيك جاري جري وقبل ما تقبض (الما٠٠هي) يتلب عليك سيد البيت.. ويقيف ليك في خشم الباب.. يعني لا تدور كدا ولا جاي.. ما عندك حق.. ولا شهادة بحث.. ماصلوا مرتبك الكان مكفيك في الغربة ما حا تلقاهو هنا، والعظمة والفرشخة والطول والعرض ما عندنا هنا.. ما تبكي عشان الكرسي الدوار وتصرخ فينا وتشتكي لي زول بعد زول لو اصلك فاهم ومالي مركزك كان زمان بقيت مدير قدر الضربة، يا قول المصريين “اد الدنيا” لكن للاسف الناس فاتوك ورموا قدام..اسع انت فاكر الناس حتتعاطف معاك “براي سويتا في نفسي” يادوب بقيت براك مافي زول شغال بيك.. تبكي بس،، وتولول بس،، حتي ولو فكرت تعمل شنو داك ولفيت الدينا ودورت ومليت القرووبات بالشكوي..انا..وانا.. كنت وكنت.. برضوا خسرانه معاك..ليه بس لانو المثل بقول “القلم مابزيد بلم” ..ويظهر ما عندك روح رياضية…قلت لي مرتبك كان كم وعربية وسواق وخدم وعشم…طيب نحنا الطير ديل عايز بينا شنو خلينا في مرضنا ووجع فشفاشنا داا وقلوبنا المقطعة دي..
انت عايز تعمل شنوا يعني.. ياراجل اتقي الله ما تقدح بمقدرات اصحابك.. ما اصلو كان بقي ليك صاحب او زميل، ابقي علي داب نفسك بس قلت لينا بعد ما” كشحت الحلة” انك كنت مع الخواجة كتف بكتف تمام، اصلهم الخواجات من زمان بحبو السودانيين حب شديد من زمان ما حاجة جديدة.. ،

دا كلو هين ياسيد’ كدي اقيف هنا عايز اسألك سؤال برئ جدا.. ليه الناس ما وقفت وشالوا معاك الشيلة..وقالوا كلامك صاااح، ديل قحاطة ويساريين وشيوعيين وكمان مدورين الشغل من براا البلد اي(عجن المهنة بالسياسة) … يعني ملو الخرتاية معاك بالكلااام عديل وفضحوا الكبار والصغار، لكن لمن يقولوا ليك “اخوك زينوهو بل راسك” وما تبكي سااااكت ، واسع حقو كفاية لغاية هنا، نقفل البلف ونقرض علي كدا.. ننتظر ونشوف منو البمسح وشو بالمناديل بعد ما يكشفوا لينا الحقيقة.. منو الصاااح ومنو الغلط..
واحسن نبطل البكي بالصوت العالي مانتصارع عشان الكرسي الدوار الاصلو زي بيت الايجار.

.. يقال بان حمار امام المسجد مات..فاتصل الامام بادارة المحلية لاجل نقل الحمار لدفنه ولم يجد ردا لمعاونته في ذلك، فاشارت اليه لجنة المسجد بان يتصل بالامير لعله يحرك عمال المحلية عشان يشيلو معاهو الحمار..
الو.. الو.. سيدي الامير..لقد مات حماري ولم نجد ردا من ادارة المحلية.
وبسخرية رد عليه الامير.. انتم من تقومون بغسل الميت ودفنه يا سيدي الامام ماذا دهاكم وماذا بكم..؟؟
فجاء رد الامام.. كان علينا اولا اخطار اهل الميت من قبل غسله ودفنه حتي لا نحاسب في ذلك..

(خمة نفس)
برافووو ادارة بنك الدم بودمدني ود. ناصر ابكر بابكر والفريق الذي بعمل بصمت من دون مخصصات في اصعب الظروف .. ولولا وجود بنك الدم لاغلقت مستشفيات الولاية.. شكرا والي الجزيرة ووزير الصحة الذان وضعا بنك الدم من ضمن اولويات صحة المواطن..
(خمة نفس)
كل التقدير والاحترام وتعظيم سلاااام لقواتنا المسلحة والمساندة التي تخوض المعارك ضد مليشيا ال دقلو المتمردة في كردفان ودارفور..
التحية والتقدير لكافة الاجهزة  الامنية والشرطية التي تعمل علي تطبيق القانون وحفظ الامن والسلااام للمواطنين.